ЗДОГАДОВАНЄ НА ПАНОЦА СИМЕОНА ХРОМИША

Дня 22. априла 2004. року, у 93. року свойого живота у Кноксвилу у ЗАД, умар о. Симеон Хромиш, священїк Крижевского владичества. Священїки и його шесцеро дзеци, зоз своїма дзецми и своїма унуками и численима приятелями поховали го на теметове до фамелийней крипти коло супруги Єлени, котра умарла 12. марца 1995. року.

Симеон Хромиш бул священїк Крижевского владичества у подполним значеню того слова. Вон служел у трох грекокатолїцких националних сеґментох владичества – горватским у Жумберку, руским у Руским Керестуре и українским у Баня Луки. Так то у Крижевским владичестве: гоч дзе служиш, то вше – при своїх.
Паноцец Хромиш ше народзел 2. мая 1913. року у Пишкоревцох при Дякове, у обисцу Карла и Єлени р. Лазор. Одроснул зоз штирома братами – Михалом, Карлом, Владимиром и Янком и шестру Марию, а два шестри умарли ище як мали дзеци. Школовал ше у Дякове, дзе пешо ходзел, вец у Врполю, дзе тиж ходзел пешо, и у Славонским Бродду, дзе каждого дня путовал на гайзибанє. А єден час бивал у родзини Колєсарових, родичох познатей филмскей ґлумици Ирини Колєсаровей, популарней „Славици”.

После матури нє було дилеми – пошол до Львова студирац богословию, а дипломовал у Заґребе 1940. року. Дня 15. септембра 1940. року повинчал ше зоз учительку Єлену Пушкаш, Новосадянку, алє на служби у Коцуре. Винчал их у Петроварадинє о. Дюра Павич. За священїка го 1. юния 1941. року у Ужгородзе пошвецел владика Александер Стойка. До Ужгороду пошол илеґално и там без церемонийох, вєдно зоз Кирилом Бесерминьом, були пошвецени. Першу свою Службу Божу одслужел у Руским Керестуре 11. юния 1941. року. После того бул намесцени на парохию у Мрзлим Полю у Жумберку.

Писал вон о своїм службованю у Жумберку и обявел то у минхенских новинох „Християнський голос”. Були то часи войни и у Жумберку були забити двоме нашо священїки (Кухар и Шимрак), а други двоме були вигнати (Биленький и Ерделї). Симеон Хромиш остал єдини грекокатолїцки священїк у цалим Жумберку.
После Жумберку паноцец Хромиш бул намесцени за капелана у Руским Керестуре, а 1955. року постава парох у Баня Луки. Пришол до места дзе у войни, з бомбами зоз английских авионох, нїби пре гришку, була знїщена парохиялна церква. У парохиялним доме бивал стари и хори парох Фране Латкович, а у другим квартелю у прижемю смесцела ше фамелия Хромишових зоз своїма осем членами. Алє, нєодлуга их отамаль державна власц вигнала и там намесцела єдну муслиманску фамелию. Хромишово ше змесцели у єдней хижи церковнїкового квартеля на парохиялним дворе. Познєйше ше преселєли до парохиялного биваня.

У єдней хвильки у Босни ше повторела ситуация яка була и у Жумберку под час войни. Сващенїки Биляк, Юриста и Биленький були у гарешту, а о. Симеон остал лєм цо нє сам у цалей Босни.

З чежку муку панїматка Єлена достала место учительки у Дебелякох и путовала на гайзибанє, або на бициґли (15 километри). Конєчно, после того достала место у Баня Луки.

Року 1969. прежили вельке трешенє жеми, у котрим парохиялни дом зоз каплїцу у партеру бул очкодовани. Обновел вон шицко цо було очкодоване и 1972. року зоз панїматку Єлену емиґровали до ЗАД, дзе им уж була дзивка Мария з мужом Петром Бобреком и дзецми.

И у Америки службовал на парохиї, у Мишвоку, у Чикаіким грекокатолїцким владичестве. Медзитим, носталґия, а и хороти, окреме панїматки, були причина же ше паноцец Симеон зоз панїматку врацаю до Югославиї, до Нового Саду. Ту уж як пензионер жил и паноцец Кирил Бесерминї, з котрим о. Симеон вєдно студирал, вєдно ше пошвецели у Ужгородзе, вєдно службовали як капеланє у Руским Керестуре и тераз вєдно як пензионере жили у Новим Садзе и помагали парохови о Романови Мизови.

А кед ше зявели витри войни цо их нова власц у Сербиї, на чолє зоз предсидательом С. Милошевичом, порушала, и кед у Вуковаре бул забити Владимир, брат о. Симеона, и його жена Катица, а познєйше другого брата Янка з цалу його фамелию вихнализоз Вуковара, о. Симеон и панїматка Єлена ше заш врацаю до ЗАД. Там уж була и друга їх дзивка Нада з мужом Зиновийом Семаком, а з родичами пошол и син Владимир зоз супругу Ганчу и дзивку Лидию. У Америки паноцец Симеон ище єден часс бул на парохиї, вец ше 1992. року врацели до Горватскей. А кед до Америки пошла и дзивка Наталка зоз свою фамелию, и вони ше двойо заш врацели до Америки, ґу дзивки Мариї. За нїма пошол и остатнї потомок цо остал на тим просторе – син Дюра. Треци син там бул уж од скорей.
То нє бул перши одход Хромишових до Америки. Ище їх орадїдо Михал там робел у индустрийних базенох Пеориа у Илиноису, котри ше врацел до Руского Керестура. Випатра же Америка була предодредзена за Хромишових од котрей вони сцекали, алє ше заш до нєй врацали. Нїкому нє познати Божо плани и людски драги будучносци. Паноцец Симеон и панїматка Єлена, тїлесно остали занавше у Америки.