In memoriam

МИХАЙЛО КОВАЧ

ДЮРА ПАПГАРГАЇ

ЛЮБОМИР РАМАЧ

ИРИНА ДАВОСИР– МАТАНОВИЧ

СИМЕОН ХРОМИШ

ДЮРА ГРУБЕНЯ

ДЮРА ПАПУҐА

о. СТЕФАН ПІТКА

МИКОЛА КИНДЗЕР

СВЯТОСЛАВ НАДЬ

ДР ЯНКО САБАДОШ

О. ДР РОМАН МИЗЬ

МИРОН ЖИРОШ

ДР ПАВЛО ЧУЧКА

На здогадованє

ДЮРА ГРУБЕНЯ
(1933–2003)

У Новим Садзе, 28. януара 2003. року, после длугшей хороти, у седемдзешатим року живота умар Дюра Грубеня, познати наш културни дїяч, єден зоз ґенерациї школярох першей рускей ґимназиї, основаней 1945. року у Руским Керестуре. По законченю малей матури опредзелює ше за ґрафичне занїманє и закончує ґрафичну школу. Скоро цали свой роботни вик робел у ґрафичним фаху, прейґ котрого здобул вельке число приятельох и познатих медзи новосадскима гражданами, припаднїками скоро шицких националних заєднїцох.

Вецей нашим ґенерацийом Дюра Грубеня познати як єден зоз плеяди активних членох, руководительох, а познєйше и як директор Културно-уметнїцкого дружтва “Максим Горки”, або нашей Матки, як ю популарно наволуєме. Наша Матка у свой час Дюрови була така як його други дом. Препровадзовал у нєй днї и ноци як член и солист у хору, як домар и як “езермайстор” котри зна шицко оправиц. Старал ше о шицким. Остарал ше за донаторох котри Дружтву подаровали потребни инвентар, адаптовал просториї, старал ше о їх естетичним випатрунку. Бул комуникативни и знал позберац коло себе способних людзох за рижни културни и други акциї у рамикох Матки.

Под час його руководительского мандата Културно-уметнїцке дружтво “Максим Горки” препородзело свою дїялносц. Попри хорскей, вельки успих посцигла и танєчна секция, цо доказую вецей златни, стриберни и бронзово плакети, освоєни на фестивалє у Руми, Награда полнолїтства и вецей други припознаня.
Дюра Грубеня, або “Бачи Дюра”, як го волали члени фолклорней секциї и младши члени хору, уживал вельки угляд у Матки, аж потамаль покля го хорота на длугши час нє одорвала од нєй.

Нашим людзом менєй познате же Дюра Грубеня бул и вельки документарист и библиофил. У своєй богатей архиви и библиотеки мал велї значни документи и скоро шицки виданя, друковани на нашим язику од перших початкох, та аж скоро по нєшкайши днї. Нажаль, пре чежки материялни обставини после пензионованя, мушел ше одрекнуц велького числа драгоциних кнїжкох, календарох, новинох и часописох. Алє остала за нїм богата документация и фотоґрафиї зоз дїялносци Културно-уметнїцкого дружтва “Максим Горки” и културного живота Руснацох у Новим Садзе и ширше.

Пошол сциха, як цо и жил у своїх пензионерских рокох, прициснути з бриґами и хороту котру анї лїки нє могли победзиц.

Поховани є 29. януара 2003. року, на Новим теметове у Новим Садзе. Випровадзело го вельке число Новосадянох и членох-ветеранох дакедишнього КУД “Максим Горки”.

Дюра Латяк


Get free Dreamweaver templates and extensions at JustDreamweaver.com