СОЮЗ РУСНАЦОХ УКРАЇНЦОХ СЕРБИЇ
У 2012. РОКУ
УСПИШНИ ПРЕДНОВОРОЧНИ КОНЦЕРТ ХОРУ «КАЛЕНА»
И КПД «КАРПАТИ» ЗОЗ ВЕРБАСУ У РУСИЙСКИМ ДОМЕ У БЕОГРАДЗЕ
Штварток вечар 27. децембра 2012. року у Русийским центре науки и култури у Београдзе отримани «Вечар русийско-українского товариства», у чиєй програми участвовали хор українскей писнї «Калена» зоз Индїї и КПД «Карпати» зоз Вербасу.
Як гварел директор Русийского центру науки и култури Денисов Михаил Генадиєвич, скорей початку концерта, то лєм початок представяня културних досягох народох хтори дакеди жили вєдно у бувшим СССР-у. З тей нагоди два дружтва представя українску културу, писню и танєц. У наступним периодзе буду представени и други култури жительох бувшого СССР-а.
На концерту присуствовали представителє дипломатского кору Русиї, України и Белорусиї. У мено українскей амбасади на концерту бул Юрий Мансвєтов зоз супругу. Тиж так на концерту бул и парох београдски о. Владислав Варга зоз панїматку Славицу, як и делегация Союзу Руснацох Українцох Сербиї на чолє зоз предсидательом Богданом Виславски, а у хторей були Велимир Паплацко, Йоаким Грубеня, Михайло Колбас зоз супругу.
Хор «Калена» на концерту одшпивал часц свойого стандардного репертоару а представел и часц материялу за нови компакт диск, дзе их провадзели члени орхестри КПД «Карпати» на чолє зоз Колетом Чизмаром.
Члени КПД «Карпати» зоз Вербасу, виведли часц свойого репертоару. Фолклорни ансамбл чий хореограф Славко Микитишин наступел зоз трома танцами и одтанцовани: Привитни танєц, Дубови танєц и Гопак, котри окреме одушевел београдску публику зоз своїма актрактивнима часцами котри виволали вельки аплаузи, а тиж так мушел буц одтанцовани и на бис. Тиж так дует Филип Пронек и Славко Микитишин публика наградзела зоз щирим аплаузом.
Таки вечари-концерти нагода же би ше београдянє упознали зоз културами народох хтори дакеди вєдно жили у СССР-у. , а нєшка у своїх самостойних державох. Предноворочни концерт у Београдзе виволал вельке интересованє представительох русийскей и українскей дияспори хтори жию у Сербиї, а тиж так и сербских почитовательох тих двох културох.
В. Паплацко
«ГАРМОНИЯ» ПО ДРУГИРАЗ НАСТУПЕЛА НА ХХІІ МЕДЗИНАРОДНИМ ФЕСТИВАЛУ ДУХОВНЕЙ ПИСНЇ У СНЇНИ
Внєдзелю 4. новембра 2012. року у Снїни у восточней Словацкей отримани ХХІІ Медзинародни фестивал духовней писнї. На фестивалу виступели дзевец шпивацки колективи, од шпивацких групох по хори, рижних конфесийох зоз Словацкей, України и Сербиї. Три колективи були зоз иножемства, два зоз України а хор «Гармония» зоз Сербиї.
Циль фестивала же би уметносц зблїжувала сушедох, як гварел у своєй привитней бешеди предсидатель Союзу русинох-українцох Словацкей Републики Петро Сокол, цо потвердзує тот фестивал зоз своїм континуитетом.
Внєдзелю предполадньом хор «Гармония» шпивал Службу Божу у грекокатолїцкей церкви «Матки нєустающей помощи» у Снїни, а службу служел о.Марош Прейса парох снїнски, а сослужовал парох новосадски о.Роман Миз.
Соботу вечар нашому парохови о.др. Романови Мизови на шветочней вечери уручена Почесна грамота Союзу русинох-українцох Словацкей Републики за окремне доприношенє и розвой култури русинох-українцох Словацкей, а знагоди його 80-рочнїци. Припознанє о. Мизови уручел Иван Лаба, длугорочни предсидатель Союзу русинох-українцох Републики Словацкей. Окрем хору у Словацкей була и делегация Союзу руснацох українцох Сербиї у хторей були Велимир Паплацко подпредсидатель Союзу и Елемир Рац член Главней Ради.
Внєдзелю пополадню у Доме култури отримани фестивал на хторим наступели шицкого дзевец хори и шпивацки групи, а дакеди на фестивалу наступали и по 17. Криза очиглядно и кед у питаню тот фестивал зробела свойо. Главни спонзор тогорочного фестивалу бул самостойни уметнїк, власник галериї Андрий Смоляк. Фестивалу присуствовала и Олга Бенч, Генералний конзул України у Пряшове.
Свой тогорочни наступ на фестивалу хор «Гармония» започал зоз шпиванку «Amazing Grace», а потим ушлїдзели и други композициї на английским и латинским язику. На концу одшпивали композицию Димитрия Бортнянского «Да воскреснєт Бог». Зоз хором дириговала Сузана Грос Маркович.
Учашнїки фестивалу достали дипломи за участвованє и пригодни дарунки од организаторох фестивалу. Петро Сокол спред Союзу русинох-українцох Словацкей наглашел же циль того фестивалу зачувац церковни шпиви восточного обряду. На законченю того фестивала шицки учашнїки вєдно на бини Дома култури зашпивали шпиванку «Многая лита» зоз чим фестивал бул закончени.
В.Паплацко
ОЗНАЧЕНИ ДЗЕНЬ НЄЗАВИСНОСЦИ УКРАЇНИ
Дня 5. септембра того року, амбасада України у Беоґраду организовала приєм у просторийох вили „Єлена“ , а з нагоди 21. рочнїци нєзависносци України.
После интонованя сербскей и українскей гимни, присутних привитал и зоз о значеньом того швета упознал амбасадор України у Београдзе Виктор Недопас.
Медзи присутнима були предсидатель Републики Сербиї Томислав Николич, предсидатель скупштини Републики Сербиї Небойша Стефанович, амбасадорка ЗАД у Београду Мери Бурс Ворлик, амбасадор Канади у Београду Роман Ващук и други госци. На святочносци бул предсидатель Националного совиту Русинох Славко Рац з делеґацию и предсидатель Националного совиту Українцох Йосип Сапун з делеґацию. Як и предходних рокох, ту була присутна и делеґация Союзу Руснацох Українцох Сербиї.
Предсидательови Союзу, Богданови Виславскому, дата чесц же би привитал предсидателая Републики Сербиї Томислава Николича и упознал го зоз досцигнуцами русинско-українскей заєднїци у Сербиї.
По перши раз, на такея святочносци, бул присутни и Дюра Папуґа, предсидатель „Рускей матки“ и Шветовей ради Руснацох/Русинох/Лемкох.
Богдан Виславски
ДЕЛЕГАЦИЯ СОЮЗУ РУСНАЦОХ УКРАЇНЦОХ СЕРБИЇ У ЛЬВОВЕ
Трочлена делегация Союзу Руснацох Українцох Сербиї, подпресидатель Велимир Паплацко, член Главней Ради Елемир Рац зоз супругу Ирину пребувала у Львове од 22. по 25. юлий 2012. року.
З тей нагоди водзени розговарки зоз представителями Всеукраїнского товариства «Лемкивщина» зоз длугорочним предсидательом тей львовскей обласней организациї др. Михайлом Секелом и терашнїм заменїком предсидателя Иваном Радьом о дальшим сотруднїцтве, двох организацийох як и о тим же би ше сотруднїцтво мелзи двома организациями дзвигло на визши уровень. Можлївосци за тото исную як гварел др. Михайло Секела хтори уж пребувал у новим садзе и Дюрдюове и гавер же то попри култури, спорт алє и други сфери живота и роботи.
Найвецей уваги у наступним периодзе треба пошвециц привредним отношеньом прето же вони найзначнєйши. У наступним периодзе треба очековац же будзе потписани Протокол о сотруднїцтве медзи двома организациями. Сотруднїцтво зоз Львовом тирва уж велї роки а почало зоз сотруднїцтвом «Просвити» зоз Львова зоз «Просвитом» у Коцуре. У Львове жил и робел родоначальник нашей литератури др. Гавриїл Костельник, а нєшка там жию и робя даєдни зоз фаховцох хторих Союз Руснацох Українцох Сербиї послал там на школованє.
Попри нащиви културно историйних памятнїкох у Львове, члени делегациї нащивели и место Рогатин, дзе обишли и памятнїк Роксолани, познатей як Хасеки Хурем султания.
В. Паплацко
ЛЕМКОВСКА ВАТРА
Ювилейна XXX Лемковска Ватра отримана у Ждинї од 20. по 22. юлий
На тогорочним XXX ювилейним фестивалу Лемковска Ватра у Ждинї наступели и аматери зоз Вербасу члени КПД «Карпати», хтори дзекуюци ангажованю Союзу Руснацох Українцох Сербиї отпутовали на тот Фестивал. Там достойно презентовали руску и українску писню и танєц. Мали два замерковани наступи а мушели даєдни танци одтанцовац и на бис, цо публика знала наградзиц зоз длугоким и щирим аплаузом.
На самим Фестивалу щицко прекрасне од пиятку кед зме там сцигли окрем хвилї, кед вецей раз пияток и соботу падал диждж. Тогорочни Фестивал бул под покровительством предсидательох Польскей и України, Бронислава Комаровского и Виктора Януковича.
Програма за шицких, од наймладших та до професионалцох як цо то наприклад шпивачки зоз Львова Анїчка и София Федина, предсидателька СФУЛО, лєбо найпознатша домашня шпивачка Юлия Дошна. На Фестивалу наступели ансамбли зоз України, Словацкей, Сербиї и Польскей. Найлєпши ансамбл на Фестивалу бул «Юність» зоз Львова хтори демостровал зоз шеснац парами и орхестру вершински танци а на моменти то на бини випатрало на наступ балетанох.
Тогорочни Фестивал здогаднул и на 65-цу акциї «Висла» 1947-2012 и висельованє Лемкох зоз їх родимих територийох после ІІ Шветовей войни.
На фестивалу окончена и промоция кнїжки «Ватра 1983-2012» хтора пошвецена трицец лемковским ватром а пририхтали ю вецей авторе. Кнїжку видало Здруженє Лемкох зоз Горлицох.
На фестивалу пребувала делегация општини Жабель на чолє зоз Драганом Злоколицом предсидательом Скупштини тей општини. Тиж так на Фестивалу пребувала и делегация Союзу Руснацох Українцох на чолє зоз предсидательом Богданом Виславским, а у хторей були и Леона Виславски, Микола М. Цап зоз супругу Весну, Елемир Рац зоз супругу Ирину, Петро Закамарок зоз супругу Славицу и подпредсидатель Союзу Велимир Паплацко.
В. Паплацко
ШВЕТО КУЛТУРИ СВИДНЇК – ПОД МАКОВИЦУ
Найстарша манифестация култури нашого народу у Регионє Централней Европи, 58-ме Швето култури Русинох-Українцох Словацкей Републики, отримане прешлого викенду(16 – ого и 17-ого юния) всоботу и внєдзелю, як и каждого року у Свиднїку.
Главни организатор фестивалу бул Союз Русинох –Українцох Словацкей Републики, а соорганизаторе фестивалу Город Свиднїк, Прешовска окружна самоуправа и Музей українскей култури у Свиднїку. Попри велького числа домашнїх и иножемних фолклорних ансамблох, на фествалє наступели ансамбли зоз України, Русийскей Федерациї, Билорусиї, Польскей, Горватскей и Сербиї, вкупно вецей як 1500 учаснїкох.
Зоз нашей жеми на фестивалє наступели аматере Културно-уметнїцкого дружтва “Петро Кузмяк” зоз Нового Орахова, зоз ново поставену кореографию народного обичаю руснацох у Войводини – Предаванє лади у млодей пред свадзбу - хтору за сценске виводзенє поставел Владимир Магоч а успишно ю виведли члени того нашого друштва, цо публика знала наградзиц зоз богатим аплаузом, як всоботу у вечаршей програми так и внєдзелю на пополадньовим Гала концерту.
Зоз Горватскей наступели два културно – уметнїцки друштва, КУД “Яким Гарди” зоз Петровцох зоз сплєтом українских танцох и КУД “Осиф Костелник” зоз Вуковару хтори за свой наступ достали вельки аплауз.
Пред фестивалом пияток у Музею українськей култури у Свидїку отворена вистава вецей як 40 малюнкох, олєйох и акварелох Владимира Провчия зоз Риєки, под назву “Україна у шерцу горватского Русина”, цо була така перша вистава єдного уметнїка зоз наших просторох у историї тей манифестациї, а хтору под час фестивалу нашчивело вельке число його учаснїкох и госцох.
Присутних на отвераню фестивала привитали предсидатель локалней самоуправи Свиднїку Ян Голодняк и предсидатель Союзу Русинох Українцох Словацкей Републики инжинєр Петро Сокол.
Всоботу пополядню у Сканзену Музею под отвореним нєбом отримана манифестация народних обичайох под назву “од Крачуна по Вельку ноц” на хторей вжали учасц числени домашнї фолклорни ансамбли и шпиваче. Програму пририхтали члени музею українскей култури зоз места.
У вецей програмох фестивалу учасц вжали ансамбли ПУЛС зоз Прешова, Земплин зоз Михаловцох, Маковица зоз Свиднїку як и числени госци зоз других жемох.
Внєдзелю предполадньом делегациї положели венци на памятнїк жертвом на Дуклї и одали почесц борцом хтори ше борели процив фашизму, на месце дзе водзена єдна зоз найвекших борбох у Другей шветовей войни. У делегациї Союзу Руснацох Українцох Сербиї на покладаню венцох були подпредсидатель Союзу Велимир Паплацко, Михайло Еделински зоз супругу Снежану, др Йован Фейди и Мирослав Малацко.
Фестивал провадзели и Олга Бенч конзул України у Прешове, академик Микола Мушинка, Федор Гоч власнїк Музею Лемковскей култури у Зиндрановей у Польскей, Штефан Гладик предсидатель Здрyженя Лемкох зоз Польскей и други.
У Свиднїку под час фестивалу пребувала и делегация зоз Вербасу – городу побратима Свиднїка зоз хторима у нащиви була и народна посланїца у Народней Скупштини Сербиї Олена Папугова.
Госцованє Новоораховчанох на Швету Култури организовал Союз Руснацох Українцох Сербиї у сотруднїцтве зоз главним организатором фестивала – Союзом Русинох Українцох Словацкей Републики.
В. Паплацко
У ПОЛЬСКЕЙ ОТРИМАНИ ПИЯТИ КОНГРЕС СФУЛО
На пиятим Шветовим Конгресу Шветовей федерациї українских, лемковских и русинских здруженьох и организацийох хтори през викенд отримани у польским городзе Горлице за нову предсидательку вибрана София Федина,политиколог и позната шпивачка лемковских писньох зоз Львова (Україна).
Софія Федина
На Конгресу були 46 делегати зоз цалого швета. До Предсидательства СФУЛО вибрани Богдан Виславски и Йоаким Грубеня, а за подпредсидателя Контролней комисиї СФУЛО вибрани Велимир Паплацко. Конгрес отримани у Двору Карвацианов у центре Горлицох а у його роботи учествовала 8 члена делегация Союзу Руснацох Українцох Сербиї. Треба повесц же на Конгресу принєшени нови Статут тей организациї и єй нови органи.
После Конгресу отримани концерт хору “Зоря” зоз Устя Горлицкого зоз гторим дириговала Ана Дубец, а музично поетски еп пошвецени творчосци Богдана Ивана Антонича виведла позната глумица и шпивачка Евелина Гвать зоз Пряшова зоз Словацкей.
Внєдзелю учаснїки пиятого Конгресу нащивели службу божу у православней церкви Святей Тройци и грекокатолїцкей церкви Святого оца Миколая.
Скорей Конгресу отримана Медзинародна наукова конференция “Карпатски регион: история, язик, култура”, у рамикох тогорочних наукових стретнуцох Ягелонского универзитету под назву “Україна през вики”.
После отриманого Конгресу єдна часц делегациї зоз Сербиї нащивела Снїну, дзе ше внєдзелю пополадню отримовал фестивал писнї – квалификацийне змаганє за тогорочну “Маковицку струну” хтора того року будзе отримана у децембру у Бардейове.
В.Паплацко
У НОВОСАДСКИМ ТЕАТРЕ КОНЦЕРТ ПЕЙЦОХ ДРУЖТВОХ
КОНЦЕРТ ПОШВЕЦЕНИ ТОЛЕРАНЦИЇ И СОТРУДНЇЦТВУ
У своєй привитней бешеди академик Юлиян Тамаш, медзи иншим, гварел же специфичносц Войводини то култура заєднїцкого живота рижних народох и почитованє професийней компетенциї, без огляду же у одредзених историйних хвилькох було и одредзени нєпорозуменя. У Войводини народи вше знали респектовац професийну компетенциx и роботу, и за тоти принципи ше ми и нєшка закладаме – гварел Тамаш
У Новосадским театре, пред полну салу публики, всоботу вечар, 18. фебруара, отримани концерт под назву “Вечар толеранциї и сотруднїцтва” на котрим наступели пейц дружтва хтори у своїх репертоарох пестує руску и українску шпиванку и танєц. Високих госцох и шицких присутних привитал предсидатель Союзу Руснацох Українцох Сербиї Боґдан Виславски, потим слово дате першому предсидательови Союзу академикови Юлиянови Тамашови, а присутних привитала и Леона Виславски, покраїнска посланїца.
Зоз своїм присуством концерт возвелїчал амбасадор України у Сербиї Виктор Недопас, преосвящени владика, кир Георґий Джуджар, апостолски еґзарх, предсидатель Националного совиту Руснацох Славко Рац, о. др Роман Миз, новосадски парох, як и представителє наших културних и образовних институцийох и здруженьох.
Публики ше зоз шпиванку и танцом представели КПД “Карпати” зоз Вербасу, КУД “Петро Кузмyк” зоз Нового Орахова, КУД “Иван Котляревски” зоз Бикич Долу, шпивацка ґрупа “Калина” зоз Индїї и Руски културни центер зоз Нового Саду. Вербащанє одтанцовали даскельо хореоґрафиї, а у українских танцох указали и акробациї хтори ше публики барз пачели, та танцовали и на бис. Ораховчанє ше представели зоз драмску сличку обичайох облїванy при Руснацох, у хторей ше и ґлумело, и танцовало, и шпивало. Аматере зоз Индїї одшпивали даскелqо українски композициї, а предсидатель индїйского Дружтва Петро Закамаров зоз солистичним виступом и одличним тенорским гласом тиж одушевел публику. Зоз Бикич Долу одлижно ше представела женска жридлова шпивацка ґрупа, як и женски дует и дзивоцки трио, а за домашнї Руски културни центер з Нового Саду виступел Хор “Гармония” под дириґенством Сузани Ґрос Маркович и у провадзеню на гармоники Владимира Сивча, директора РКЦ. Новосадски хор указал високи квалитет шпиваня, хтори посцигнути за кратки час, бо хор иснує лєм даскельо роки, алє часто наступа и на своїм репертоару ма духовни, церковни и народни композициї.
Концерт закончени зоз “Многая лїта” хторе одшпивал Хор “Гармония”, а yк визначел предсидатель Союзу Боґдан Виславски, намира же би тот концерт идуцих рокох прероснул до фестивала. През програму успишно нас водзел Александер Мудри, а орґанизатор того концерта бул Союз Руснацох Українцох Сербиї. После концерта у просторийох Руского културного центру орґанизоване друженє зоз закуску.
О. П-С.
П О З И В Н И Ц А - П О В О Л А Н К А - З А П Р О Ш Е Н Н Я
САВЕЗ РУСИНА УКРАЈИНАЦА СРБИЈЕ
СОЮЗ РУСНАЦОХ УКРАЇНЦОХ СЕРБИЇ
СОЮЗ РУСИНІВ УКРАЇНЦІВ СЕРБІЇ
Позивамо Вас да присуствујете концерту русинских и украјинских песама и игара који ће се одржати у суботу 18.02.2012. са почетком у 19.00 часова у Новосадском позоришту (Бен Акиба, Јована Суботића 3-5).
Поволуєме Вас присуствовац концерту руских и українских писньох и танцох хтори ше отрима на соботу 18.02.2012. хтори почнє на 19.00 годзин у Новосадским театре (Бен Акиба, Йована Суботича 3-5).
Запрошуємо Вас взяти участь у концерті русинських і українських писень і танців який відбудеться в суботу 18.02.2012 року о 19.00 годині у Новосадському театрі
(Бен Акіба, Йована Суботича 3-5).
УЧЕСТВУЈУ: КПД „КАРПАТИ“– ВРБАС, КУД „ПЕТРО КУЗМЈАК“ НОВО ОРАХОВО, КПД „ИВАН КОТЉАРЕВСКИ“ – БИКИЧ ДОЛ, ХОР „КАЛИНА“ – ИНЂИЈА И ХОР „ХАРМОНИЈА“ – НОВИ САД
УЧАСТВУЮ: КПД „КАРПАТИ“–ВЕРБАС, КУД „ПЕТРО КУЗМЯК“ НОВЕ ОРАХОВО, КПД „ИВАН КОТЛЯРЕВСКИ“ – БИКИЧ ДОЛ, ХОР „КАЛИНА“ – ИНДЖИЯ И ХОР „ХАРМОНИЯ“ – НОВИ САД
БЕРУТЬ УЧАСТЬ: КПТ„КАРПАТИ“–ВЕРБАС, КХТ „ПЕТРО КУЗМЯК“ НОВЕ ОРАХОВО, КПТ„ІВАН КОТЛЯРЕВСЬКИЙ“ – БИКИЧ ДОЛ, ХОР „КАЛИНА“–ІНДЖІЯ І ХОР „ХАРМОНІЯ“ – НОВИЙ САД
ОРГАНИЗАТОР САВЕЗ РУСИНА УКРАЈИНАЦА СРБИЈЕ
ОРГАНИЗАТОР СОЮЗ РУСНАЦОХ УКРАЇНЦОХ СЕРБИЇ
ОРГАНІЗАТОР СОЮЗ РУСИНІВ УКРАЇНЦІВ СЕРБІЇ
