СОЮЗ РУСНАЦОХ УКРАЇНЦОХ СЕРБИЇ
У 2010. РОКУ
ДВАЦЕТИ ФЕСТИВАЛ ДУХОВНЕЙ ПИСНЇ У СНЇНИ
НАСТУП НОВОСАДЯНОХ ЗА ПАМЕТАНЄ
Двацети, ювилейни Фестивал духовней писнї, котри традицийно орґанизує Союз Русинох-Українцох Словацкей Републики (СРУСР), отримани 7. новембра у Снїни (Словацка). У святочней атмосфери, Фестивал отворел министер за културу Словацкей Републики Даниєл Крайцер, а учаснїкох привитали и о значеню манифестациї бешедовали предсидатель Централней ради СРУСР Петро Сокол и городоначалнїк Снїни Штефан Миловчик.
На Фестивалє участвовали дзевец хори або шпивацки ґрупи зоз Словацкей и три з иножемства – два з України и єден зоз Сербиї. З нашей жеми на Фестивалє по першираз наступел Мишани хор Грекокатолїцкей церкви св. апостолох Петра и Павла и Руского културно-просвитного дружтва з Нового Саду, под руководительством дириґентки Сузани Ґрос-Маркович.
Наш хор одшпивал штири композициї: „Евхаристийни канон” Арханґелского, „Святий Боже” Заєца (соло Зденка Орос), „Во царствию Твоєм” Христова (соло Свитлана Декар) и „Вирую” Чайковского. Публика з вельку увагу провадзела їх наступ и щиро наградзела кажду їх точку, а фаховци наглашели же то єден з найлєпших хорох цо того року участвовал на Фестивалє.
Попри нашого хору наступели и два хори з України – Закарпатски народни хор з Ужгороду и Мишани хор Катедралней церкви з Хусту. Обидва хори тиж указали високи квалитет уметнїцкей интерпретациї духовней писнї нашей Церкви, окреме тот з Ужгороду, котри того року означує 65-рочнїцу свойого иснованя. Од домашнїх колективох з квалитетом ше видвойовал Мишани хор Богословского факултету з Пряшова, а за нїм нє заоставали анї други хори з рижних местох Восточней Словацкей.
Попри наступу на Фестивалє, новосадски хор всоботу, 6. новембра, отримал заєднїцки концерт з младежским фолклорним ансамблом „Жридлочка Карпатох” з Ужгороду у валалє Збой, котри ше находзи на тромеджи Словацкей, Польскей и України. Програма у Збою останє запаметана по рижнородним и змистовим реперторе, котри публики успишно презентовал часц нашей музичней творчосци, а нам оможлївел упознац ше зоз закарпатску музично-фолклорну традицию у виданю єдного з найлєпших младежских ансамблох у України нєшка.
Внєдзелю предполадньом наш хор шпивал Службу Божу у Грекокатолїцкей церкви Мацери Божей неустающей помоци у Снїни. У преполней церкви Службу вєдно служели о. др Роман Миз, парох новосадски и о. Марош Прейса, домашнї парох. Наступ новосадского хору и на тот завод украшела зоз свою соло точку Свитлана Декар, котра одшпивала познату писню „Аве Мария”.
Госцованє новосадского хору на Фестивалє духовней писнї у Снїни орґанизовал Союз Руснацох Українцох Сербиї у рамикох сотруднїцтва з главним орґанизатором Фестивала Союзом Русинох-Українцох Словацкей Републики. Под час нащиви, о нїх ше нєпреривно старал Михайло Иванцо, член предсидательства СРУСР и предсидатель Реґионалней ради СРУСР, дзекуюци котрому и пришло до тей нащиви.
На Фестивалє, попри найузшого руководства новосадского хору, о. др Романа Миза, пароха новосадского и Бориса Сакача, директора хору, присуствовала и делеґация Союзу Руснацох Українцох Сербиї у составе Славко Джуджар, секретар и Владимир Сакач, член Главней ради, а як госци були и Мирослав Кевежди, директор Заводу за културу войводянских Руснацох и Микола М. Цап, одвичательни редактор часописа „Шветлосц”.
М. М. Цап
Александра Дудаш
ПРЕСЛАВЕНА 20-РОЧНΪЦА СОЮЗУ РУСНАЦОХ УКРАΪНЦОХ СЕРБИΪ
Союз Руснацох Українцох Сербиї означел 20-рочнїцу свойого иснованя и роботи, 25. и 26. септембра зоз Святочну академию и концертом у Студию “М” у Новим Садзе. Святочна академия отримана 25. септембра, а присутних привитал предсидатель Союзу Боґдан Виславски, хтори окреме визначел за тоту нагоду поволаних числених госцох зоз Горватскей, Польскей, Мадярскей, Словацкей и України. Поволани були и госци зоз Словениї, Македониї и Босни и Герцеґовини, алє вони пре оправдани причини нє пришли, алє послали винчованки.
Окреме привитани и Мато Ґрозница, заменїк покраїнского секретара за управу, предписаня и национални меншини, покраїнска посланїца Леона Виславски, предсидатель Националного совиту Руснацох Славко Рац, владика кир Георгий Джуджар, о, Роман Миз, амбасадор України у Беоґрадзе Виктор Недопас, секретар Амбасади України Олександер Кириченко и предсидатель општини Петроварадин Петро Мудри.
Як гварел Мато Ґрозница 20. рочна робота Союзу була плодотворна и на таки способ допринєсла же би Войводина остала тото цо є, мултикултурална, мулатинационална и мултиконфесионална реґия.
Вон наглашел же покраїнска администрация и надалєй будзе помагац Союзу и шицким националним меншином и їх орґанизацийом, були вони мали, або вельки, алє тота помоц нє помогнє нїч кед же Союз нє витирва у очуваню идентитета Руснацох и Українцох на простору Войводини.
– Я вас модлїм же бисце витирвали и надалєй у тей роботи и очекуєм же бисце пренєсли и младшим ґенерацийом шицко тото цо твори идентитет вашого народу, же би тото цо сце по тераз посцигли могло жиц и у будучносци – гварел Мато Ґрозница.
Предсидатель Националного Совиту Славко Рац винчовал ювилей и гварел же зме на тих просторох витирвали 260 роки и же гоч маме завидни ступень людских и меншинских правох у демократичней держави мушиме ше сами старац о себе и од нас завиши кельо будземе ище тирвац на тих просторох.
– Нарок будзе нови попис жительства и вец ше увидзи кельо нас остало. Прето апелуєм на шицких же би ше вияшнєли як Руснаци и Українци. Треба патриц на науково и историйни факти, бо нас так єст мало у Сербиї же бизме ше мало право дзелїц – гварел Славко Рац.
Телеграми винчованки послали и подпредсидателька Влади Войводини Ана Томанова-Маканова, предсидатель младежскей орґанизациї “Пакт Рутенорум” зоз Руского Керестура Владимир Чижмар и длугорочни предсидатель Союзу Симеон Сакач. Рочнїцу винчовала и покраїнска посланїца Леона Виславски и амбасадор України Виктор Недопас.
УРУЧЕНИ ПРИПОЗНАНЯ НАЙЗАСЛУЖНЄЙШИМ
На Святочней академиї бувши предсидателє Союзу академик Юлиян Тамаш и др о. Роман Миз оглядли на 20 рочну роботу тей орґанизациї. Як гварел академик Тамаш Союз витирвал 20 роки на принципох сотруднїцтва рускей и українскей меншини и робел на хасен и єдней и другей меншини, як и на хасен держави. Союз и нєшка ма свой смисел и оправданє за свойо иснованє як єдна файта “министерства вонкашнїх дїлох” за Руснацох спрам України и Штреднєй Европи, а як “министерства нукашнїх дїлох” за Українцох у Сербиї, бо кельо єст острасцених Руснацох тельо єст и острасцених Українцох.
Численим орґанизацийом и поєдинцом, хтори за тоти 20 роки сотрудзовали зоз Союзом уручени припознаня, а достали их медзи иншима академик Юлиян Тамаш, о. Роман Миз, др Мария Сакач, Симеон Сакач, Покраїнски секретарият за управу, предписаня и национални меншини, Покраїнски секретарият за информованє, Покраїнски секретарият за образованє, Амбасада України у Беоґрадзе, Национални совит Руснацох, Национални совит Українцох, Радио-телевизия Войводини, НИУ “Руске слово”, Дружтво сербско-українского приятельства, партнере зоз иножемства и велї други.
СВЯТОЧНИ КОНЦЕРТ У СТУДИЮ “М”
На святочним концерту хтори отримани 25. септембра у Студию “М” Радио Нового Саду наступел хор Грекокатолїцкей парохиї Святих апосотолох Петра и Павла и Руского културно-просвитного дружтва под руководством Сузани Ґрос.
Венчик українских шпиванкох одшпивали у дуету Надїя Воротняк и Галина Вуячич зоз Вербасу, а провадзел их оркестер КПД “Карпати”.
На святочним концерту руски шпиванки одшпивали солисти Борис и Владимир Маґочи зоз Нового Орахова, а провадзел их тамбурови оркестер КУД “Петро Кузмяк”.
Конферансу на трох язикох сербским, руским и українским водзели Александер Мудри и Златко Рамач.
ВОЗПОСТАВЕНЕ СОТРУДНΪЦТВО ЗОЗ УКРАΪНСКИМ НАЦИОНАЛНИМ СОВИТОМ
Делаґация Союзу ше у рамикох преслави стретла у Заводу за културу войводянских Руснацох зоз директором Мирославом Кевеждийом. Директор Кевежди упознал госцох зоз роботу и компетенциями Заводу, зоз реализованима проєктами и будуцима планами. Вон поволал представнїкох орґанизацийох же би сотрудзовали зоз Заводом, а поготов на медзиреґионалних проєктох за хтори мож конкуровац до фондох Европскей униї.
О дїялносци Националного совиту Руснацох бешедовали предсидатель його Одбору за урядове хаснованє язика Боґдан Виславски и член Леона Виславски, а о Радио-телевизиї Войводини Дюра Варґа.
Делеґациї обишли и руску редакцию у РТВ Войводини дзе их прияли главни и одвичательни редактор Радия Радован Балач, подпредсидатель Покраїнского явного сервису Дюра Варґа, редакторка редакциї на руским язику у Радию Златица Няради и редактор рускей редакциї у телевизиї Мирко Канюх.
У українским Националним совиту представнїкох Союзу приял предсидатель Йосиф Сапун. На тот способ после длугшого часу возпоставене сотруднїцтво медзи Союзом у Националним совитом Українцох.
Предсидатель Йозеф Сапун бешедовал о дїялносци українского националного совиту, проєктох, положеню українскей меншини у Сербиї, и стану у култури, образованю и медийох Українцох у Сербиї.
На нєдзелю служена Служба Божа у церкви святих апостолох Петра и Павла, хтору служел апостолски еґзарх кир Георгий Джуджар, а Службу возвелїчал мишани хор парохиї и РКПД.
После Служби Божей отримане зашеданє предсидательства СФУЛО у просторийох РКПД на хторим розпатрани актуални проблеми, алє и плани тей орґанизациї по конєц рока и сотруднїцтво зоз партнерскима орґанизациями.
ПОЗИВ * ЗАПРОШЕННЯ * ПОВОЛАНКА
Поволуєме Вас на святочну Скупштину Союзу Руснацох Українцох Сербиї з нагоди 20-рочнїци тей орґанизациї.
Скупштина ше отрима 25. и 26. септембра 2010. року у Новим Садзе.
Приход госцох плановани 24. септембра 2010. року до просторийох Союзу, Йована Суботича 8, Нови Сад, од 15 по 18 годзин.
Програма:
25. септембер 2010.
- на 10 годзин схадзка зоз представнїками Городскей власци Нового Саду, Влади Войводини и Националних совитох рускей и українскей меншини
- на 12 годзин обиходзенє городу
- на 16:30 годзин Святочна академия и Скупштини Союзу
- на 19 годзин концерт аматерох Руснацох Українцох
- на 21 годзин вечера зоз оркестром Руснацох Українцох
26. септембер 2010.
- На 10 годзин Служба Божа у церкви Святих апостолох Петра и Павла у Новим Садзе
- На 11:30 годзин схадзка СФУЛО
- На 13 годзин Конференция за новинарох
- На 15 годзин одход госцох
Зоз преслави:
Контакт телефон: 021 838 299 Моб: 064 1250973
E-mail: vislavskibogdan@gmail.com
Обновени „Липовлянски стретнуца“
Тогорочни сттретнуца булуи барз добре орґанизовани. У централним парку були поставени 40 штанди националних меншинох и їх друштвох, а и других орґанизацийох и приватнїкох, котри понукали на предай рижни сувенири, дзелєли рекламни материяли и понукали специялитети своєй кухнї.
Шицко почало з округлим столом, а после була промоция Бориса Ґралюка „100 роки українскей грекокатолїцкей парохиї Липовляни“ о котрей бешедовали предсидатель українскей заєднїци у Републики Горватскей Иван Семенюк, грекокатолїцки парох у Липовлянох о. Василь Крень, Микола Земан, о. др Роман Миз и сам автор Борис Ґралюк.
Пред початок концерту сцигол предсидатель Републики Горватскей др Иво Йосипович. Вон ше длуго затримал при штандох националних меншинох, а потим отворел „Липовлянски стретнуца“.
На концерту виступели 16 колективи. Окрем липовлянского хору „Лира“, горватского дружтва „Лїпа“ и українских „Карпатох“, виступели ансамбли Чехох, Мадярох, Словакох, Талиянох зоз Водняну, Бошнякох, Македонцох, Албанцох, Сербох, Руснацох („Яким Гарди“ зоз Петровцох), Чарногорцох, Єврейох, Ромох, Горватох и Талиянох зоз Италиї. На площи при парку було коло три тисиячи патрачох.
У самих Липовляхох активни пейц културно-уметнїцки дружтва: хор „Лира“, горватске „Лїпа“ и українски „Карпати“, чешске и словацке. Перши три виступели на стретнуцох, а остатнї два препущели учасц госцом, припаднїком меншинох зоз других местох.
Ютредзень, соботу, 28. авґуста, у рамикох Липовлянских стретнуцох, одбули ше спортски змаганя и забава у парку.
Най здогаднєме, „Липовлянски стретнуца“, манифестация и фестивал писнї и танцу националних меншинох у Горватскей, обновени после дванац рокох. Перши стретнуца були 1976. року, а остатнї 1990. року. У їх програми бул и округли стол з одредзену тему, концерт фолклорних ансамблох и хорох националних меншинох, вистава и спортски знаганя. Того 1990. року и шлїдуюци штири-пейц роки вони ше нє отримовали пре войнову ситуацию блїзко самих Липовлянох, а и у цалей Горватскей. А познєйше пре одредзени становиска даєдних политичних партийох, котрим то нє було по дзеки, тоти ше Липовлянски стретнуца нє обновели.
Українске културно-просвитне дружтво „Карпати“ самоинициятивно 2002. року порушує ФАСТ-НАМ (Фестивал националних меншинох), цо ше одбувало три роки. Року 2006. „Карпати“, заш пре политични препреченя, орґанизую „Вечер писньох и танцох Українцох и Руснацох“, а припаднїки других националних меншинох були лєм госци на тей манифестациї.
И после шицкого, на инициятиву даєдних ентузиястох и предсидателя општини Мариа Рибара (Словака) и подтримовку жупанки Сисачко-Мословачкей Марини Ловрич-Мерцел, обновени Липовлянски стретнуца по старей програми. Сам предсидатель Републики Горватскей, др Иво Йосипович, приял ше буц покровитель тей манифестациї.
На стретнуцох хтошка гварел же ше Република Горватска стара войсц до Европскей Униї, а тогорочни „Липовлянски стретнуца“ указали же Европска Уния уж вошла до Липовлянох.
В. Паплацко
ШВЕТОЧНИ ПРИЄМ З НАГОДИ ДНЯ НЄЗАВИСНОСЦИ ОТРИМАНИ У БЕОҐРАДЗЕ
Пияток 10. септембра на поладнє у Вили Єлена фамилиї Карич у Беоґрадзе отримани шветочни приєм з нагоди Дня нєзависносци України хтори ше у тей жеми шветочно означел 24. авґуста того року. Було то 19. означованє рочнїци нєзависносци а орґанизовала го амбасада України у Републики Сербиї.
На шветочносци були присутни представителє дипломатичних мисийох у Сербиї, сербских державних орґанох, медийох, рускей и українскей заєднїци у Сербиї. Треба повесц же на тогорочним приєму вихаснована нагода за винчованки з нагоди тей рочнїци членом українскей амбасади на чолє зоз амбасадором Виктором Недопасом. Тиж так водзени розгварки о дальших акцийох и сотруднїцтве у наиходзацим периодзе. На приєму бул присутни и нови перши секретар амбасади України хтори праве тих дньох припутовал на нову длужносц до Сербиї. Тиж так члени Союзу Руснацох Українцох Сербиї поволали представительох амбасади же би 25. и 26. септембра були госци тей орґанизациї на єй шветочним означованю 20 роки роботи Союзу. Союз з тей нагоди представяли Владимир Сакач и Велимир Паплацко, а українску заєднїцу на приєму представял предсидатель Националного совиту Українцох Йосиф Сапун. У розгваркох потвердзене же у наступним периодзе амбасада України а и сама Україна буду ище вецей помагац свойо найстарши дияспори на Балканским полуострове.
Б. Виславски
ЛЕМКОВСКЕ ШВЕТО У ЗАБРИДЮ
Закарпатска обласна орґанизация Лемкох того року порихтала свой перши фестивал 4. и 5. септембра у валалє Забридь у Веклькоберезнянским реону под назву „Лемковска ватра“. Як и на потерашнїх фестивалох котре организую Лемки України прейґ свойого Товариства „Лемкивщина“, поволани и госци з иножемства, першенствено з Польскей, Словацкей, Сербиї, Зєдинєних Америцких Державох итд. З боку Сербиї присутни були представителє Националного совиту Руснацох и Союзу Руснацох Українцох Сербиї. Национални совит представяли предсидатель Славко Рац, його заменїк Миронь Сабадош, предсидатель Вивершного одбору Йовген Мудри, як и член Совиту и посланїца Скупштини АП Войводини Леона Виславски. З боку Союзу на фестивалу бул предсидатељ Богдан Виславски, котри источашне и предсидатель Одбору Совиту за службово хаснованє язика и писма, а як госц предсидатель КУД „Тарас Шевченко“ з Дюрдьова Маринко Дудаш и новинар Мирон Жирош.
Першого дня, пред фестивалом, делегацию зоз Сербиї прияли предсидатель Велкоберезнянскей державней делегациї Иван Олїйник и предсидатель Велкоберезнянскей реонскей ради Василь Канюк. Фестивал святочно отворени на дванац годзин, дзе ше представителє власци и иножемних делегацийох обрацели публики и привитали ю.З боку нашей делегациї то зробел Богдан Виславски. На самим фестивалу виступели велї ансамбли, солисти и орхестри з України, найвецей зоз Закарпатскей обласци. После фестивала отримани мотообегованя, а за госцох организоване друженє.
За други дзень фестивала були предвидзени тиж так мотообегованя, алє з оглядом на подлу хвилю, нашо представителє ше розишли по валалох дзе жили нашо предки,тє. по Червеньове и Порошкове. Пондзелок на 12 годзин нашу делегацию прияли представителє Обласней державней администрациї Закарпат'я, и то Мотильчак Михайло, началнїк управи просвити и науки обласци, Глеба Юрий, начальнїк управи култури, Дзихар Михайло, представитель Министерства вонкашнїх дїлох, Петришина Любов, руководитель по питаньох українскей дияспори у оддзеленю по питаню националносцох и Шутанич Наталия, главни специялиста по питаню националносцох. У бешеди розпатрана можлївосц ширшого сотруднїцтва котре би требало реґуловац зоз Контрактом котри би могла подписац Закарпатска обласна администрация и АП Войводина, а сотруднїцтво фактично иснує уж велї роки.
Треба надпомнуц же наша делеґация пред фестивалом, пияток 24. авґуста нащивела Снїну у Словацкей, дзе ше стретла зоз городоначальнїком Штефаном Миловчиком, а источашнє организовани концерт и друженє зоз шпивацку групу „Старинчанка“, котра була госц у Дюрдьове на фестивалє „Най ше нє забудзе“ того року.
С. Джуджар
ОТРИМАНИ СЕДМИ ФЕСТИВАЛ КУЛТУРИ НАРОДНИХ МЕНШИНОХ У СЛОВАЦКЕЙ
БИКИЧАНЄ У ОРЯБИНИ
Фестивал у Словацкей, наволани „Упознай и чувай традицию своїх предкох”, почал 21. авґуста 2010. року, кед ше представели шицки ансамбли на главней улїци у Орябини: ансамбли зоз восточней Словацкей, „Калинка” зоз Москви (Русия), колектив фолклору зоз Ужгороду (Україна) и КУД „Иван Котляревски” зоз Бикич Долу (Сербия). Шицки ансамбли представели свойо обичаї, а Сримци, зна ше, понукали зоз колачами, грозном и добрим вином хторе велї покоштовали на „Свадзби”, котра там приказана лєм з часци.
Фестивал отворел Петро Сокол, предсидатель Союзу Русинох-Українцох Словацкей Републики, як и староста валала, Микола Каня.
Як спомнуте, Бикичанє ше представели зоз „Сримску свадзбу” у хореоґрафиї Венямина Бульчика, та ше велї госци и домашнї здогадали на свадзби яки ше давно отримовало на Горнїци. За прекрасни наступ Бикичанє достали моцни аплауз, а коруна шицкого була кед на концу шицки вєдно одшпивали „Многая лїта”.
Внєдзелю Бикичанє були у Камйонки на Служби Божей у нашей грекокатолїцкей церкви. У приємним друженю пририхтане заєднїцке вешелє од котрого ше и єдним и другим було чежко одпитац. У Боґлярки госцох привитал староста валала мр Юрай Джмура, а потим нащивени наша церква, школа и теметов. Нє заобишло ше анї место Луков, дзе госцох привитала старостка валала Йозефина Крамарова. Тото место познате по тим же ше з нього жителє висельовали праве до Бикичу и околних местох, а нащивена и древена грекокатолїцка церква у Венециї, такой при Лукове.
У уводним слове, пред вечаршим концертом, кратши историят о презвискох Руснацох, котри ше до Бикичу одселєли пред 160 роками, пречитал академик Микола Мушинка и предсидатель Совиту месней заєднїци у Бикичу Деян Бобаль.
Внєдзелю вечар Бикичаньох драга одведла до Бардейова, а ютредзень нащивели Бардейовски купелї, Сканзен и його околїско.
Фестивал реализовани з финансийну подпору Министерства култури Словацкей Републики, як и зоз помоцу Союзу Русинох-Українцох Словацкей. На тоту драгу Бикичанє пошли у орґанизациї Союзу Руснацох Українцох Сербиї, а у делеґациї бул єй секретар Славко Джуджар.
Александра Дудаш
ОТРИМАНА ЛЄТНЯ ШКОЛА У СУБОТИЦИ
ТОГО РОКУ УЧАСТВОВАЛИ И ГОСЦИ ЗОЗ СЛОВАЦКЕЙ
Тогорочна Лєтня школа у орґанизациї Союзу Руснацох Українцох Сербиї отримана у Суботици у штредньошколским Доме школярох од 13. по 15. авґуст. Того року була по першираз интернационална, бо на нєй участвовали и дзеци зоз Бардейова зоз Словацкей.
-web.jpg)
На нєй участвовали коло 30 дзеци рускей и українскей националней меншини зоз Суботици, Нового Орахова, Бачкей Тополї, Шиду, Бачинцох, Бикичу.
Госцом зоз Словацкей то перша нащива Лєтнєй школи. Як гварел предсидатель бардейовского округу Мартин Хома, пестованє руснацтва на таки способ барз значне и подзековал на красним приєме домашнїм и городу Суботица на помоци.
Лєтню школу отворели предсидатель Националного совиту Руснацох Славко Рац, покраїнска посланїца Леона Виславски, член суботицкей городскей Ради задлужени за образованє, воспитанє, културу и информованє Слободан Чампраґ и предсидатель Союзу Руснацох Українцох Сербиї Боґдан Виславски.
-web.jpg)
Славко Рац окреме привитал дзеци, прето же, як гварел, барз важне од малючка пестовац любов ґу националному, зачувац и розвивац свойо же бизме обстали на тих просторох. Слободан Чампраґ пренєсол пребаченє городоначальнїка Суботици Саши Вучинича же нє присуствовал на отвераню, а шицким учашнїком пожадал успих у роботи и приємне друженє.
Виславски бешедовал о початку орґанизованя тей школи давного 1966. року, наглашуюци значносц сотрудзованя, упознаваня и повязованя дзецох зоз шицких наших штредкох.
Дзеци мали нагоду слухац преподаваня зоз историї, традициї и виронауки хтори преподавали професор историї Мирон Рамач и Микола Сеґеди.
Як гварел Мирон Рамач, преподаваня зоз историї були подзелєни на два тематични часци до приселєня Руснацох и початок живота рускей националней меншини на тих просторох, односно снованє церкви школи и других културних институцийох.
Учашнїки нащивели визначни будинки у Суботици, Городску хижу, Синаґоґу, церкви, найстаршу посластичарню и Дружтво Руснацох у Суботици дзе их привитали Наташа Ґрунчич и Иван Гарди, а мали и вилєт на Палич и до Зоолоґийней загради.
– Дзеци зме жадали упознац зоз визначнима Руснацами хтори жию у Суботици, а то уметнїца Таня Таґасович, дзивка Мафтея Виная, Ису Планича, познатого алпинисту и Александра Лукича, витражисту, медзитим пре одредзени причини то нє могло буц орґанизоване – гварел координатор тогорочней Лєтнєй школи Микола Сеґеди.
Як гварел Микола Сеґеди, идея була же би ше после 10 рокох отримованя Лєтнєй школи зачувало єй континуитет, а же би ше проєкт видзвигло на єден висши и квалитетнєйши уровень и же би прероснул до озбильного медзинародного проєкта. Идея була же би ше поволало и учашнїки зоз України, Словацкей, Польскей и Мадярскей, медзитим, пре лимитирани средства того року госци пришли лєм зоз Словацкей.
Отримованє тогорочней Лєтнєй школи финансийно помогли Национални совит Руснацох и Город Суботица.
Александра Дудаш
М. М. Цап
ДВАЦЕЦ ОСМА „ЛЕМКИВСКА ВАТРА” У ЖДИНЇ
ВЕРБАЩАНЄ НА ШВЕТУ КУЛТУРИ ЛЕМКОХ
Под почесним патронатом Малопольского войводи Станислава Крацика, у Ждинї (Польска) од 23. до 25. юлия отримане Двацец осме швето лемковскей култури „Лемкивска ватра”, котре уж традицийно орґанизує Обєднанє Лемкох Польскей з Горлицох. После Швета култури у Свиднїку то найвекши и найзначнєйши фестивал Русинох-Українцох Стредней Европи, на котри каждого року приходза вецей тисячи патраче и понад тисяч учаснїки з рижних крайох Польскей, України, алє и зоз сушедних жемох та и споза океану.
Фестивал почал пияток, 23. юлия, зоз святочним палєньом ватрового огня и концертом народного ансамбла писнї и танцу „Лемковина” з Львова, чийо члени з найвекшей часци потомки вигнанцох з Лемкивщини 1945-1946. року. Перши дзень фестивала у основи прешол у знаку дзецинских и младежских колективох з Польскей и України.
Соботова програма почала з молебеном и панахиду за жертви акциї „Висла” под Дзвоном миру над ватровим польом (ище док була красна хвиля). Молебен вєдно одслужели священїки Грекокатолїцкей и Православней церкви з учасцу хору „Лемковина”, а венци ґу памятнїку положели представнїки польскей влади и українских орґанизацийох. Урядове отверанє „Ватри” отримане у ареалу амфитеатра. Предсидатель орґанизацийного комитету Степан Гладик давал слово почесним госцом фестивалу, котрих було даскельо дзешатки. У мено Союзу Руснацох Українцох Сербиї (СРУС) присутних привитал його предсидатель Боґдан Виславски, а ґу присутним ше обрацела и Леона Виславски, посланїца Скупштини АП Войводини.
Вельки упечаток на публику охабел виступ поета Дмитра Павличка, дакедишнього амбасадора України у Польскей, котри з краснима словами описал свойо сотруднїцтво з нєдавно погинутим предсидательом Польскей Лехом Качиньским и терашнїм предсидательом Брониславом Коморовским на полю преглїбйованя українско-польских одношеньох.
Гоч у барз нєвигодних условийох, бо скоро през цали час фестивала падал моцни диждж, на манифестациї виступело вельке число як домашнїх фолклорних колективох и шпивачох, так и репрезентативних ансамблох з України, Словацкей и Сербиї. Зоз Сербиї на „Лемкивскей ватри” по перши раз виступело Културно-просвитне дружтво „Карпати” з Вербасу, котре ше всоботу и внєдзелю представело зоз фолклорним ансамблом, шпивацку ґрупу, дуетами и оркестром.
Фолклорна ґрупа вербаских „Карпатох” одтанцовала „Гуцулку”, „Сокайски козачок” и „Гопак”, у хореоґрафиї Славка Микитишина, а шпивацка ґрупа виведла венчик руских и українских писньох, под руководительством Надїї Воротняк. Тамбурови оркестер успишно провадзел и єдних и других, а його руководитель бул Микола Чизмар Коле. Публика з вельким интересованьом провадзела їх виступ и щиро наградзела кажду їх точку. Тото окреме було видно на законченю програми, кед Вербащаньом припадла чесц зоз своїм виступом урядово заврец тогорочни фестивал и пожадац шицким же би ше на рок знова стретли на истим месце.
Фестивал „Лемкивска ватра” провадзели вецей интересантни програми: конкурс за найкрасшу дзивку „Ватри” – „Мис Лемковина”, „Лемкивска спартакияда”, вистава малюнкох Стефана Телепи, скулптурох Марка Пивонского, фотоґрафийох Олї Рущак, писанкох Мариї Колочави, проєкция филмох „Ой, рушел маляр до швета” и „У Новици на концу швета”, як и велї други.
И попри нєвигодней хвилї, и учаснїки и патраче були задовольни, бо Двацец осма „Лемкивска ватра” з уметнїцку програму и медзисобнима стретнуцами Лемкох розшатих по цалим швеце унєсла до нїх нову енерґию, виру и надїю же лемковска култура и попри чежкей долї нє препадла и же нє препаднє у будучносци. А доказ тому окреме масовна учасц младих на тим нєповторююцим Швету лемковскей култури.
На фестивалє, попри найузшого руководства вербаских „Карпатох”, присуствовали и члени Националного совиту рускей националней меншини Леона Виславски, Нада Лендєр, Йовґен Мудри и Михайло Еделински, а як почесни госци були и Боґдан Виславски, предсидатель СРУС, Микола М. Цап, одвичательни редактор часописа „Шветлосц”, Йоаким Грубеня и др Микола Новта, члени Главней ради СРУС, Мирон Жирош, публициста и Маринко Дудаш, предсидатель КУД „Тарас Шевченко” з Дюрдьова.
Представнїки СРУС и посланїца Скупштини АП Войводини Леона Виславски стретли ше з вецей особами политичного и културного живота Польскей, Словацкей и України, медзи котрима бул и городоначалнїк Горлицох Кажимеж Стеркович, посланїк польского парламенту Витолд Кохан, а тиж и члени делеґациї Союзу Русинох-Українцох Словацкей Републики, як и функционере вецей лемковских орґанизацийох з України.
При врацаню з Польскей, делеґация СРУС нащивела Стару Любовню и Орябину, дзе мала окреме плодни розгварки з предсидательом Союзу Русинох-Українцох Словацкей Републики Петром Соколом и старостом Орябини Миколом Каньом. У розгварки окреме наглашена културна черанка и учасц наших колективох на фестивалох у Словацкей, з окремним огляднуцом на предстояци фестивал у Орябини концом авґуста, кед з нашей жеми на тим фестивалє по перши раз виступи Женска шпивацка ґрупа КУД „Иван Котляревски” з Бикич Долу.
Госцованє Вербащаньох на „Лемкивскей ватри” у Ждинї орґанизовал Союз Руснацох Українцох Сербиї, а за їх одход материялно ше остарала општина Вербас и ЯП „Вербас”.
МЕДЗИНАРОДНИ КОНҐРЕС У ЛЬВОВЕ
У Львове, у України, од 23. до 25. юния отримани Треци медзинародни конґрес „Дияспора як фактор утвердзеня держави України у медзинародней заєднїци: сучасни стан, проєкция до будучносци”. Конґрес робел у осем секцийох, а єдна з нїх була и „Лемки як состойна часц шветового українства”, у чиєй роботи вжали учасц 17 делеґати и вецей як 30 почесни госци з Мадярскей, Польскей, Словацкей и Сербиї.
Медзи учаснїками на Конґресу бул и Мирон Жирош зоз Мадярскей, котри виступел зоз рефератом „Шлїди Лемкох у Мадярскей”, док з нашей жеми сообщенє мал Микола М. Цап з насловом „Народна и церковна архитектура Руснацох Сербиї”, котре у одсутносци автора презентовал академик Микола Мушинка зоз Словацкей. Як госц на Конґресу присуствовал и др Микола Новта, член Главней ради Союзу Руснацох Українцох Сербиї.
Конґрес у Львове орґанизовал Медзинародни институт просвити, култури и вязох з дияспору Националного универзитету „Львовска политехнїка”, а єден зоз соорґанизаторох була и Шветова федерация українских лемковских орґанизацийох.
М. М. Цап
ПРОМОЦИЯ КНЇЖКИ О. РОМАНА МИЗА У НОВИМ САДЗЕВЕЛЬКИ ДОПРИНОС НАШОМУ НАРОДУ
Промоция новей кнїжки о. Романа Миза “Живот чече и капка” отримана у Руским културно-просвитним дружтве у Новим Сазде у орґанизациї Союзу Руснацох Українцох Сербиї. О кнїжки окрем автора бешедовал и рецензент Микола М. Цап хтори гварел же о. Роман Миз вельо допринєсол нашому народу и як священїк, новинар, редактор, историчар, прекладатель, библиоґраф, професор, културни и явни роботнїк.
По його словох, кнїжка о. др Романа Миза, як нови и ориґинални прилог историї Крижевскей епархиї, односно нашого Апостолского еґзархату, а у нєдостатку другей литератури, будзе и хасновити приручнїк зоз общей историї нашей Церкви.
Дзекуюци тому велькому проєкту ширини залапеня историйно-биоґрафского материялу у приступу и обробки каждого поєдинєчного мена, велї дилеми з нашей церковней историї дефинитивно розчисцени и преставаю буц загадка за фаховцох и науку.
Сам автор гварел же на идею пришол пре два причини – технїчно-практични и идейни. Перше прето же керестурска парохия найвекша и найстарша, а друга пре улогу церкви и живоце народа, дзе церква фундамент коло хторей ше зазберує єден народ. Автор наявел и нову кнїжку зоз тей едициї хтора будзе закончена по конєц рока, а то история парохиї у Вербаше, а збера и материяли зоз историї парохиї у Коцуре.
На промоциї як госц бул и амбасадор України у Сербиї Виктор Недопас хтори бешедовал на тему конституциї України и упознал присутних зоз историю конститутивного документа. По його словох Дзень конституциї України ше слави 14 роки, кеди принєшени документи сучасней України.
Перши конститутивни документ принєшени ище початком прешлого вику, алє аж од кеди Україна постала нєзависна, його ше почало применьовац. У новшей историї документ дожил велї трансформациї, дополнєня и вименки за хтори українски фаховци оценєли же су нєпотребни и же з часци подзелєли українску явносц и политику и приведла до дисбалансу у парламенту, а задаток того документу – треба же би бул праве єдинство держави.
Промоцию отворел предсидатель Союзу Руснацох Українцох Сербиї Боґдан Виславски, модератор вечара бул новинар Велимир Паплацко, а подїю возвелїчал хор Руского културно-просвитного дружтва под руководством Сузани Ґрос.
А. Д.
ШВЕТО КУЛТУРИ РУСИНОХ-УКРАЇНЦОХ СЛОВАЦКЕЙ ОРАХОВЧАНЄ У СВИДНЇКУ
Под покровительством предсидателя Словацкей Републики Ивана Ґашпаровича, у СвиднЇку од 18. до 20. юния отримане 56. Швето култури Русинох-УкраЇнцох Словацкей, найвекша и найзначнєйша манифестация култури нашого народу на тих просторох
Фестивал почал з наступом Закарпатского обласного театра бабкох “Бавка” з Ужгороду и стретнуцом з українскима писателями у Поддуклянскей библиотеки. У предлуженю отримане мальованє на асфалту, як и отверанє вистави “Композиция” автора Милана Бандурчина. За младих у амфитеатре отримани концерт ґрупи “Дуал – Релакс”. Попри велького числа домашнїх фолклорних ансамблох, наступели и зоз України, Русийскей Федерациї и Сербиї.
На Фестивалє по першираз участвовали и аматере КУД “Петро Кузмяк” з Нового Орахова зоз познату хореоґрафию з обичаями, танцами и шпиванками на руских салашарских прадкох. Дружтво мало удатни наступ, за хтори достали дарунок од орґанизатора Фестивала.
Аматере зоз Нового Орахова дали концерт и у Вишнїм Мирошове, нєдалєко од Свиднїку. Програму концерта провадзело вельке число патрачох и делеґация Союзу Руснацох Українцох Сербиї з Нового Саду.
У рамикох манифестациї положени венци чехословацким вояком на Дуклї. Венєц положела и делеґация Союзу Руснацох Українцох Сербиї, у котрей були Йоаким Грубеня, Славко Джуджар, Михайло Еделински, як и делеґация Бичич Долу зоз предсидательом Совиту МЗ Деяном Бобальом.
У амфитеатре аматере з Нового Орахова мали два наступи на котрих достали вельки аплаузи численей публики. После официєлней програми за младих, концерт отримала ґрупа “Гудаки” з України. Учашнїки були на Служби хтору предводзел владика Ян. У Сканзену отримана Фолклорно-етноґрафска програма “Скарби народу: Винчуєме Вам, винчуєме” сценаристи и режисера Йосифа Вархола.
Госцованє Ораховчаньох на Швету култури орґанизовал Союз Руснацох Українцох Сербиї у сотруднїцтве зоз Союзом Русинох-Українцох Словацкей. Делеґация нашого Союзу, вєдно зоз другима госцами Фестивала була окреме сердечно прията у Михала Бартка, городоначалнїка Свиднїку и Милана Цоцулї, руководителя окружней канцелариї, як и других орґанизаторох Фестивала.
Нащива старому краю
Делеґация Бикичу у составе Деян Бобаль, предсидатель Совиту МЗ, член Совиту Мирослав Сокол и Янко Гнатко, член Церковного одбору вєдно зоз Йоакимом Грубеньом зоз Союзу Руснацох Українцох Сербиї, була у Лукове, Бардейове и Свиднїку у Словацкей. У Лукове були на поволанку Йозефини Крамаровей, старостки валала.
– Бешедовали зме о сотруднїцтве медзи нашима валалами на културним планє, алє и по питаню спортского сотруднїцтва наших фодбалских клубох, а тиж и ловарских здруженьох. Порадзене же би делеґация Лукова у септембру пришла до Бикичу – гвари Деян Бобаль.
Бобаль гвари же Бикичанє нащивели и Бардейов дзе их приял Борис Ганущак, городоначальнїк того места.
Сотруднїцтво зоз Словацку Републику спрам Бобальових словох будзе конкретизоване 21. авґуста, бо Бикичаньох поволал Союз Русинох-Українцох Словацкей на фестивал до Орябини, дзе найвироятнєйше наступи шпивацка ґрупа “Бикичанки”.
С. Джуджар/Вл. Дї.
Удатни наступ Ораховчаньох
Бикичанє з городоначальнїком Борисом Ганущаком
ОДЛИКОВАНЯ З НАГОДИ 65 РОКОХ ОД ПОБИДИ НАД ФАШИЗМОМ
З нагоди 65 рочнїци побиди над фашизмом хтора 9. мая на шветочни способ означена у цалим швеце, зоз указом предсдиателя України Виктора Януковича зоз орденом за тоту нагоду одликовани и 52-ме борци, учаснїки Дргей шветовей войни зоз Сербиї. Медзи нїма ше нашли и 9-ец представителє Руснацох и Українцох зоз наших местох Руского Керестура, Нового Саду, Коцура, Вербасу и Индїї хторим осмого мая у амбасди України у Сербиї у Беоґрадзе, амбасдор України виктор Недопас уручел тоти припознаня. Ордени достали: Йоаким Рац, Янко Яворник, Емил Паплацко, Яким Планчак и Яким Надь зоз Руского Керестура, Янко Уйфалуши зоз Нового Саду, Юлиян Хромиш зоз Коцура и Звонко Гемон зоз Индїї. После уручованя припознаньох зоз наградзенима у розгварки ше затримали члени амбасди України у Сербиї. На тот способ борци Другей шветовей войни достали ище єдно високе припознанє за свойо участвованє у борби процив фашизма з тей нагоди зоз иножемства.
Було интересантне чуц їх здогадованя на тоти чежки алє славни днї их младосци хтору дали борби процив фашизма после 65 рокох.
Боґдан Виславски
СТРЕТНУЦЕ У УЖГОРОДЗЕ
У главним городзе Закарпатскей обласци Україини, у Ужгородзе, 20. и 21. марца отримане дзевяте зашедане президиї СФУЛО. У просторийох Закарпатскей обласней орґанизациї писательох України, у улїчки Жупанатскей, у центре городу, зашеданє отворел предсидатель СФУЛО Володимир Ропецкий. Вон дал звит о роботи у 2009. року. Член секретарияту М. Гнатюук винєсла План роботи за 2010 рок. Свойо звити о роботи у прешлим року и плани за тот рок винєсли предсидатель Товариства „Лемкивщина“ Олександр Венгринович, предсидатель Союзу Руснацох Українцох Сербиї Боґдан Виславски, предситатель Союзу Русинох Українцох Словацкей Петро Сокол, и член предсидательства Обєднаня Лемкох з Польскей, Петро Шафран. О дїялносци Закарпатскей обласней орґанизациї Лемкох информацию дал предсидатель Обласней организациї Товариства Лемкивщина Закарпатскей обласци Василь Мулеса.
Догварене же би ше почал видавац „Звитно информацийни билтен СФУЛО“, же би ше друковал албум о историї СФУЛО „Швет СФУЛО“, же би ше у Львове отримали медзинародни науково конференциї „Визначни особи Лемкивщини“ и „Духовна спадщина Лемкох“. Потримане видаванє новинох „Лемки Карпат“ котри почала видавац обласна организация Товариства „Лемкивщина“ Закарпатскей обласци. Члени президиї, як и представителє присутних орґанизацийох, поволани на святочну скупштину Союзу Руснацох Українцох Сербиї, на котрей ше означи двацета рочнїца снованя Союзу.
Внєдзелю, 21. марта, присутним госцом орґанизована екскурзия по Закарпатю. Медзи иншим, нащивени Перечин и почасни хрест у тим месце пошвецени погинулим борцом Карпатскей України у марце 1939. року, котри пробовали зопрец Гортийово войско при забераню їх краю.
