СОЮЗ РУСНАЦОХ УКРАЇНЦОХ СЕРБИЇ
У 2009. РОКУ

Рочна скупштина

Медзинародне
сотруднЇцтво

Означовaни Голодомор

Промоция филма

ПромоциЇ кнЇжкох

Успихи и припознаня
членох Союзу

Дзень нєзависносци
УкраЇни

Интернет презентация
Союзу

План активносцох
за 2008. рок

ПРИЛОГИ:

ОТРИМАНИ IX ШВЕТОВИ КОНҐРЕС УКРАЇНЦОХ

„ЛЕМКОВСКА ВАТРА“ У ЖДИНЇ

„ЛЕМКОВСКА ВАТРА“ У МОНАСТИРСКИМ

СТРЕТНУЦЕ ЗОЗ ПРЕДСТАВИТЕЛЯМИ СОВИТУ ЕВРОПИ

Архива по рокох

2011. рок

2009. рок

2007. рок

СОЮЗ РУСНАЦОХ УКРАЇНЦОХ СЕРБИЇ
У 2009. РОКУ

Велимир Паплацко

ВЕЛЬКА САЛА БУЛА ЦЕСНА

Вовторок 29-го децембра з початком на 19 годзин у Городскей библиотеки, у орґанизациї Союзу Руснацох Українцох Сербиї и Городскей библиотеки зоз Нового Саду орґанизовани вечар на тему Крачунски обичаї при Руснацох и Українцох. Тот вечар прешол у знаку сторочнїци од народзеня учителя Мизхайла Ковача доаена рускей литератури и Игора Богдана Антонича найпознатшого поети Лемковини, як и у знаку 90 рочнїци од снованя руского народного просвитного дружтва. На початку сходу присутних госцох хторих було коло 150  сала була мала та половка зоз нїх стали привитали их директор Городскей библиотеки Драґан Коїч и предсидатель Союзу Руснацох Українцох Сербиї Боґдан Виславски. О Крачунских обичайох бешедовали докторе Роман Миз, новосадски парох и доктор Янко Рамач хтори преподава на новосадаским и беоґрадским универзитету.

Отец доктор Роман Миз бешедовал о феномену Крачуна зоз вецей аспектох: зоз историйного, филозофско теолоґийного, етнолоґийного, културолоґийного як и  зоз фамилийного аспекту.
А Крачун як гварел отец Раман Миз ма широке значенє од радосци до плачу, аолє гевтого од радосци пре народзенє малого дзецка у хторим Бог пришол на тот швет. Крачун колїска нашей вири. Цо би ше случело кед би нє було крачуна? Ми би ище вше були паганє славянскей вири верели бизйме до перуна, русалкох... Нє исновало би 90 одсто християнского мистецства, окреме малярства, дзе би ше находзел Микел Андєло и други творителє? Нє исновали би анї  капитализм анї социялизм, ми би жили ище вше у робовласнїцких одношеньох. Мали бизме лєм панох – робовласнїкох а ми би були раби. Кед би нє було Християнства ми би були углавним раби а дахто з нас би бул и робовласнїк правда таких би було мало. Жени би були робинї хлопох, хтори би були полиґамисти цо значи же би мали по вецей жени.
Кед слово о моралним аспекту ище вше би були на моци природни закон: око за око, зуб за зуб. Владало би ґесло же нїкому нє треба нїч пребачиц, нє було би гуманого одношеня чловека спрам чловека... Шицко тото християнско пременлєо. Статус чловека найвисшого животного єства, на тим швеце би нє исновал. Идея достоїнства чловека и його чесци приходзи аж зоз християнством.
Чловек ма душу, од Бога достату. Вон ма свойо достоїнство и право на свою чесц. Право на свой мир и мир у своєй души и шерцу. А мир нєиснує кед нєт жридла мира а то сам Бог. Слово боже на першим месце християнства. Мир на шицких уровньох то идеал крачуна, любов, мир и почитованє треба же би тирвали цали єден рок и цали наш живот. Кед одаваме Славу Богу, после того нам шлїдзи радосц живота. Прави християнє вше радосни, гварел медзи иншим у своїм викладаню доктор отец Роман Миз. 

О доаенови Рускей литератури Михайлови Ковачови бешедовал академик Юлиян Тамаш хтори то зробел и о Игорови Боґданови Антоновичови. Стихи Михайла Ковача, уметнїцки интерпретовал рецитатор Александар Мудри и то писнї «Бешедо моя» и «Я дуб червоточни» а стихи Игора Боґдана Антонича, «Вилїя» и други интерпретовал Деян Бобаль предсидатель Совиту МЗ зоз Бикич Долу. Коляди з тей нагоди шпивали женска шпивацка ґрупа зоз Бикич Долу «Бикичанки» як и дуо Бабичова и Цирбова. На клавиатурох их провадзел пан Бабич.

На тим стретнуцу хторе заєднїцки направели городска библиотека и Союз Руснацох Українцох по першираз Крачунски обичаї руснацох и Українцох представени на серским язику нашим согражданом Новосадяном медзи хторима були велї визначни особи. Треба спомнуц насампредз нашого владику кир Георгия Джуджара, предсдиательку Кола сербских шестрох, бувшого предсидателя Скупштини городу Зорана Вучевича, а тиж так присутни були и Олена Папуґа посланїк у Скуптшини Сербиї и Леона Виславски посланїк у Скупштини Автономней Покраїни Войводини. Госцованє Бикичаньох було праве  дожице прето же женска ґрупа зоз того места под назву «Бикичанки» иснує лєм коло 2 мешаци я як резултат их успишного госцованя ушлїдзела поволанка пароха беоґрадского оца Владислава Варґи и директора Каритасу за Сербию и Чарну Гору же би госци зоз Бикичу нащивели Беоґрад и шпивали коляди за Трокралї. Тота нєкаждодньова подїя у городскей библиотеки вшелїяк же будзе запаметана з боку численей публики у хторей ше находзели од штредньошколцох та по пензионерох єдни медзи другима Мадяре, Серби, Руснаци и други народни и народносци хтори жию у Новим Садзе. Вшелїяк же то було успишне законченє роботи Союзу у 2009-тим року а сотруднїцтво зоз Городску библиотеку з боку Союзу ше предлужи.

Велимир Паплацко

ДЮРДЬОВЧАНЄ И ЖАБЕЛЬЦИ ПОСЦИГЛИ ВЕЛЬКИ УСПИХ НА ФЕСТИВАЛУ ДУХОВНЕЙ МУЗИКИ У СНЇНИ

Внєдзелю 8-го новембра у месце Снїна у восточней Словацкей, у Републики Словацкей отримани 19-ти по шоре Фестивал духовней музики. На фестивалу виступели 11-ац хори зоз штирох европских державох, Польскей, Сербиї, України и Републики Словацкей.
Зоз Сербиї, Войводини на фестивалу вжали учасц мишани хор пасторала зоз Жаблю и жридлова женска ґрупа Културно уметнїцкого дружтва «Тарас Шевченко» зоз Дюрдьова.

Вони на Фестивалу шпивали крачунски коляди: Вифлеєми новина, Пречистая Дїва, Небо и земля, Народился Исус Христос, Пасли пастире, Бог ся раждаєт и Дивная новина. Публика зоз моцним аплаузом наградзела їх виступ а велї у сали хтора прима коло 400 места у прекрасним Доме култури станули и длуго кляпкали после їх наступу.

Члени мишаного хора зоз Жаблю Пасторала у своїм наступу виведли композиция Димитрия Ґолемовича, Стевана Мокраньца, Миодраґа Ґоведарици, Романа Курка и Димитрия Бортнянского. Вони тиж достали аплауз на отвореней сценич. Попри того на Фестивалу наступели и грекокатолїцки хор Димитриос зоз Порачу зоз Словацкей, хор Ясенки зоз Гуменого зоз Словацкей, православни хор храму Святей Тройци зоз Свиднїку, женски шпивацки хор грекокатолїцкого храму зоз Рускей Поруби зоз Словацкей, Олґа Поповичова зоз Перемишлю зоз Польскей, фолклорна ґрупа Старинчанка зоз Снїни зоз Словацкей женски камерни хор Намустото зоз Шемисла зоз Польскей, камерни хор православного богословского факутлтету прешовского универзитету як и шпивацки хор Кредо при грекокатолїцким катедралним храме зоз Ужгороду зоз України.

Додайме ґу тому же пред поладньом истого дня члени жридловей ґрупи зоз Дюрдьова шпивали коляди и Службу божу у грекокатолїцкей церкви у Снїни а члени мишаного хору зоз Жаблю Пасторала шпивали службу божу у православней церкви тиж у Снїни. Додайме ґу тому же вечар пред тим всоботу и хор зоз Жаблю и женска жридлова ґрупа зоз Дюрдьова отримали цаловечарши концерт свойго репертоару у месце Убля хторе далєко дас 20 километри од Снїни на драги ґу України. И тамтейша публика зоз одушевийом прияла госцох зоз Войводини и ище длуго после концерту вєдно зоз нїма шпивала руски, сербски и українски шпиванки.
Треба повесц же найлєпши упечаток на фестивалу охабел хор Кредо грекокатолїцкого катедралного храму зоз Ужгороду а такой после нїх вшелїяк женска жридлова ґрупа зоз Дюрдьова и мишани хор Пасторала зоз Жаблю.
До того госцованя хору зоз Жаблю и жридловей ґрупи зоз Дюрдьова пришло дзекуюци партнерским одношеньом двох Союзох союзу руснацох українцох Сербиї и Союзу Русинох-Українцох Словацкей хтори бул и орґанизатор 19-го Фестивала духовней музики у Снїни.

А. Дудаш

У НОВИМ САДЗЕ ОЗНАЧЕНА РОЧНЇЦА ГОЛОДОМОРУ

З минуту цихосци у новосадским Руским културно-просвитним дружтве дата чесц жертвом Голодомору у України 1932/33. року, хтора ше означує каждого року остатнєй соботи у новембру.
Тогорочну рочнїцу Союз Руснацох Українцох Сербиї означел зоз трибину на тоту тему, а о нєй бешедовали совитнїк амбасадора України у Беоґрадзе Олександр Кириченко, др Янко Рамач и редактор часописа “Шветлосц” Микола М. Цап.
Як гварел Олександр Кириченко, Голодомор у України трицетих рокох прешлого вику цалком пременєл демоґрафску слику України, бо страдали велї парасти у українских валалох, а животни вик жительом драстично зменшани.
– Тота траґична подїя преглашена як ґеноцид над українским народом, а 2006. року Верховна рада України поволала шицки жеми на медзинародне припознанє того ґеноциду. Потераз го припознали Австралия, Канада, ЗАД, Естония, Ґрузия, Литвания, Мадярска, Польска и Арґентина – гварел Кириченко.

Прешлого року Европски парламент принєсол резолуцию по хторей голодомор у України бул насилно направени же би ше виволало ґеноцид над українским народом.
О Голодомору у часопису “Шветлосц” 2003. року обявена наукова робота, а редактор того часописа Микола М. Цап гварел же ше 55 роки о тей теми у України нє шмело бешедовац.
О Голодомору у тедишнїм чаше писали и нашо медиї, насампредз, “Руски новини”, хтори видавало Руске народне просвитне дружтво, “Ридне слово” и “Заря”, алє и беоґрадска “Политика”. О тих написох бешедовал др Янко Рамач, хтори вианализовал писанє тих медийох о тей траґичней подїї.
Як гварел др Рамач, и теди руска интелиґенция була подзелєна. Док єдни писали же Голодомор видумство українских националистох и же ше о тим бешедує же би ше при Руснацох нє розвивали комунистични идеї, други були прешвечени же українски парасти наисце страдали пре Сталїнов режим и були примушени краднуц жито зоз власних польох прето же им большевики брали цали урожай.

По законченю Трибини, Олександр Кириченко уручел  помоцнїкови директорови РТВ Войводини Михалови Рамачови припознанє українского министра вонкашнїх дїлох Петра Порошенка з нагоди 60-рочнїци РТВ Войводини. Припознанє дате з нагоди доприношеня информованю рускей и українскей националней меншини у Войводини, з чим оможлївене чуванє їх култури и традициї хтору принєсли зоз Оцовщини.
Як гварене, Україна барз почитує роботу РТВ Войводини же ше вона намага задоволїц културни и духовни  потреби на мацеринскм язику українскей и рускей националней меншини.

Михал Рамач достал награду

Медзи пейцома кандидатами котру були предложени за достaванє Новемберскей награди, члени Комисиї вибрали Михала Рамача, совитнїка ґенералного директора Радио-дифузней установи Войводини.  У обгрунтовању назначене, медзи иншим, же Рамач до того року бул главни и одвичательни редактор новинох „Данас“, же дипломовал историю на Филозофским факултету у Новим Садзе и же ше зоз новинарством занїима од 1975. року. Робел у „Руским слове“, „Дновнїику“, „Нєезависних“, „Нашей борби“, а попри у „Данас“-у бул и главни и одвичательни редактор  Войводини“. Єден є зоз сновательох Нєзависного дружтва новинарох Войводини, добитнїик новинарских наградох „Станислав Сташа Маринкович“, „Светозар Милетич“ и „Светозар Маркович“ и др. Автор шейсц кнїижкох писньох, а обяавел и два кнїжки политичних есейох.

АМБАСАДОР УКРАЇНИ У СРИМСКИХ КАРЛОВЦОХ

од 24. по 27. септембер у Сримских Карловцох отримана традицийна «Kарловацка оберачка грозна»

На тей манифестациї промововане туристиче понуканє Карловцох як винох и продуктох винїцарства тиж так и пчоларства и других ремеслох хтори ше у тим месце пестую у векшей мири. У културно уметнїцкей програми медзи другима участвовали Звонко Боґдан, Владо Ґеорґиєв, Велька тамбурова орхестра Радио телевизиї Войводини, ґрупи Валентино, Амайлия, Нєверни беби и числени културно уметнїцки дружтва зоз цалей нашей жеми. За тоту нагоду була отворена и вистава под назву «Карловацки винїцаре и винаре». Городоначалнїк Сримских Карловцох Миленко Филипович пияток 25. септембра приял у своїм кабинету амбасадора України Виктора Юриєвича Недопаса хтори у провадзеню совитнїка амбасади Олександра Кириченка пришол до першей нащиви Сримских карловцох. З тей нагоди попри присуства манифестациї водзени и розгварки медзи городоначалнїком и предстаавителями українскей амбасади о даьшим сотруднїцтве медзи Сримскима Карловцами и державу Україну. Здогаднїме же у прешлосци у месце дзе отворена перша сербска ґимназия числени професоре були праве зоз України. Найпознатши медзи нїма бул Емануил Козачински по походзеню зоз Києва хтори попри того же бул професор и директор ґимназиї у Сримских карловцох и перши писатель Сербскей кореодрами. Амбасадор Виктор Недопас з тей нагоди обишол вецей значни обєкти у Сримских Карловцох як цо то будинок ґимназиї, православну церкву Святого отца Миколая як и патрияршийски двор. Єдно зоз заключеньох розгваркох у Сримских Карловцох то же пошвидко Сримски Карловци ше побратимя зоз даєдним городом у України.

НА ДЗЕНЬ НЄЗАВИСНОСЦИ УКРАЇНИ

ПРИЄМ У БЕОҐРАДЗЕ

У Беоґрадзе у готелу “Гаят” 10. септембра нови амбасадор України у Беоґрадзе Виктор Недопас пририхтал приєм з нагоди 24. авґуста, Дня нєзависносци України.
На приєму було вельо представнїкох дипломатского и воєного кора Сербиї, аташеи, як и представнїкох українскей и рускей националней меншини, представнїки церквох у Сербиї и явни особи, а числена була и делеґация Союзу Руснацох Українцох Сербиї.
Нови амбасадор України меновани нєдавно, а до Сербиї є инауґуровани зоз Ираку, дзе пред тим окончовал свой дипломатични мандат.
А. Д.

ДЗЕЦИНСКИ МЕДЗИНАРОДНИ ФОДБАЛСКИ ТУРНИР У БАРАНИНЦОХ

Од 28. до 30. августа того року у Баранинцох, котри представяю предмесце Ужгороду, отримани III дзецински медзинародни турнир з малого фодбалу. На турнир поволани екипи з України, Словацкей и Сербиї и то з местох цо ноша мена животиньох. З України наступели фодбалере з Бусовиска, Баранинцох, Воловецу, Ужгороду, Ракова, Медведивцох, Турї Пасики, Коропецу, Голубини, Чайковичох и з Вовкова. Зоз Словацкей виступели фодбалере з Вранова на Топлї, а зоз Сербиї зоз Жабелю. На турнир поволани и тим з Коцура, котри нє мог присц пре Кирбай, та место их виступела екипа под меном «Коцур», составена зоз бавячох з Дюрдова и Пидгорного (Україна ), а котра одбавела два змаганя. Екипа Жабелю була составена зоз шейсцох фодбалистох зоз Дюрдова, двох зоз Жабелю и єдного з Чурогу. Виступели вкупно шеснац екипи.

Фодбалере зоз Жабелю одбавели шейсц змаганя, од котрих маю єдну побиду, два нєришени резултати, а два змаганя страцели. Перше место на турниру завжали фодбалере з места Воловец, друге место з Баранинцох, треце место з Руских Комаривцох, штварте место з Бусовиска, док екипа Жабелю пията. Найлєпши фодбалере з Жабелю були Давид Салак и Милош Максимович.

Турнир организовали Баранинска валалска рада на чолє з Павлом Чучком-младшим и Благодарни фонд « Е. Еган « з Ужгороду, а одход наших фодбалерох организовали Союз Руснацох Українцох Сербиї и Спортски союз општини Жабель. На турниру були присутни предсидатель скупштини општини Жабель Степанов Милорад, члени Општинскей ради Боро Милич и Витомир Лисица, подпредсидатель скупштини општини Жабель Йовица Панич, як и посланїца скупштини Войводини Леона Виславски.

За госцох з Сербиї домашнї организовал обиходзене централней часци Ужгороду, Катедралней церкви, Етнографского музею итд. Окреме, домашня младеж наших фодбалерох одведла до Клубу-ресторану байкерох и организовала им диско вечар. Жабельци домашнїх поволали же би участвовали на фодбалским турниру котри ше отрима на лєто 2010. року u Жабелю.

У РУСКИМ КЕРЕСТУРЕ ОТРИМАНИ СЕМИНАР ЗА МЛАДИХ

У школи “Петро Кузмяк” у Руским Керестуре од 27. по 30. авґуст, отримани дзевяти по шоре, Семинар за младих хтори орґанизує Союз Руснацох Українцох Сербиї.

Младим учашнїком Семинара понукнути даскельо теми зоз историї, култури, литератури и виронауки, о яких нє можу дознац у своїм порядним школованю. Викладаня зоз историї отримали др Янко Рамач, на тему “Свадзебни обичаї при Руснацох”, и проф. Иван Пап о теми “Насельованє Руснацох до Бачкей”. Микола М. Цап, редактор “Шветлосци” младим бешедовал о “90-рочнїци Руского народного просвитного дружтва (РНПД)”, а Микола Шанта, редактор Видавательней дїялносци “Руского слова”, о “100-рочнїци народзеня учителя Михайла Ковача”. О теми нашей вири и обряду, зоз младима бешедовал керестурски капелан о. мр Дарко Рац.

Условия студираня на України учашнїком Семинара презентовали студенти Соня Паплацко и Мирко Преґун, а о роботи руских медийох бешедовала Александра Дудаш, новинарка и координаторка Семинара.

Кажди дзень, млади участвовали и у роботи трох секцийох, драмскей котру водзел писатель, режисер и ґлумец Владимир Кочиш, подобовей хтору провадзел уметнїк Владимир Дороґхази и у музичней зоз студентом музики Мирком Преґуном. Окреме интересантна була и креативна роботня о тканю котру водзели професорка Биляна Романова и дизайнерка Лидия Рамачова у хторей було презентоване тканє як ремесло и у Руским Керестуре и вообще у швеце. Млади учашнїки Семинара попри тим мали нагоди и за друженє и рижни рекреативни змисти.

Семинар ше намага прицагнуц прозберац младих Руснацох и Українцох зоз шицких наших местох. На тот завод учашнїки пришли зоз Нового Саду, Дюрдьова, Коцура, Нового Орахова, Вербасу, Суботици и Руского Керестура. Було их 28 од 13 по 18 роки, понеже пре нєдостаток финансийних средствох того року и число учашнїкох як и число дньох отримованя Семинара були огранїчени.

Семинар финансовал Покраїнски секретарият за образованє, гоч конкуроване за средства до велїх институцийох. Медзитим, без огляду на минимални средства, мож повесц же Семинар бул удатни и же прави успих же є и отримани и же нє претаргнути континуитет з оглядом на економску кризу и почежкосцох при обезпечованю средствох за його отримованє.

Нарок, кед ше означує ювилейна 20-рочнїца од снованя Союзу и 10-рочнїца отримованя Семинару, орґанизаторе ше буду намагац орґанизовац тоти преслави на високим уровню, та так наявени велї новосци у програми Семинара.

Най здогаднєме, Семинар за младих ше под тим меном орґанизує уж дзевец роки, а вон заправо нашлїднїк дакедишнєй Лєтней школи за младих котра почала далєкого 1966. року, дараз тирвала и по двацец днї и зоз по 100 учашнїками. Дзепоєдни дакедишнї єй учашнїки тераз и преподаваче, або нашо визначни културни роботнїки.

ОТРИМАНИ ФЕСТИВАЛ "ДЗВОНИ ЛЕМКИВЩИНИ"

У Монастириску, у Тернопольскей обласци України 1. и 2. августа того року отримани XI фестивал лемковскей култури "Дзвони Лемкивщини". У тей обласци жиє коло двасто тисячи Лемкох, а у сушедней Ивано-Франковскей обласци коло штерацец и пейц тисячи. Найвекша концентрация Лемкох у Монастириску, котри ма коло дзешец тисячи жительох, та ше прето фестивал ту и отримує.

Окрем домашнїх, того року на фестивалу участвовали и госци з Польскей и Сербиї. Було коло тисяч учашнїкох у програми, а исту провадзело вецей як петнац тисячи патрачох.Зоз Себиї наступело КУД "Петро Кузмяк" з Нового Орахова, з орхестру и соло шпиваками, а под руководством Михала Еделинския. Вони першираз виступели всоботу, а другираз внедзелю. Виведли вецей писнї бачванско-сримских Русинох, и даскельо українски писнї. Наш ансамбл публика барз добре прияла и наградзела зоз моцнима и длугима аплаузами и овациями.

Фестивал провадзели члени предсидателства СФУЛО на чолє з предсидательом Володимиром Ропецким, представителє Товариства "Лемкивщина" з Львова, як и делегация "Обєднаня Лемкох" з Польскей, Союзу Русинох-Українцох Словацкей и Союзу Русинох Українцох Сербиї. Представителє тих орґанизацийох мали окремну чесц директно ше обрациц публики, привитац присутних и повесц даскельо слова о активносцох їх орґанизацийох.

На фестивалу були присутни числени представителє уряду України, духовних власцох, як и заменїк министра култури України панї Олґа Бенч. Зоз Сербиї була присутна посланїца Скупштини Войводини Леона Виславски.

Окреме сердечне стретнуце було з директором "Етноґрафично-мемориялного музею Володимира Гнатюка" з Велеснева, Остапом Черемшинским. У тим музею постої стаємна вистава пошвецена бачванско-сримским Русином и пребуваню Володимира Гнатюка у наших местох у терашнєй Сербиї. Нажаль, пре вельку оддалєносц, тот музей нашо людзе ридко маю можлївосц нащивиц.

При приходу на фестивал, аматере КУД "Петро Кузмяк", пияток вечар зашли и до Ужгороду, дзе дали концерт у ресторану "Деца у нотара".

ОДПИТУЮЦА НАЩИВА АМБАСАДОРА УКРАЇНИ
АНАТОЛИЯ ОЛЇЙНЇКА У НОВИМ САДЗЕ

Штварток 23-го юлия амбасадор України у Сербиї Анатолий Олїйнїк одпитал ше од институцийох и поєдинцох зоз хторима сотрудзовал у цеку свойого мандата у Сербиї, а хтори жию и робя у Новим Садзе. Амбасадорови Олїйнїкови прешол штиророчни мандат роботи у нашей жеми после чого ше враца до України и будзе робиц у Министерству Вонкашнїх дїлох. До менованя нового амбасадора України у Сербиї компетентни у амбасади будзе Олександар Кириченко потерашнї совитнїк амбасадора у Беоґрадзе. На стретнуцу у Новим Садзе амбасадор Олїйнїк зоз представителями Союзу Руснацох Українцох Сербиї медзи хторима бул и новосадски парох доктор отец Роман Миз, виповед велї слова подзекованя домашнїм. У розгварки зоз присутнима амбасадор гварел же му було приємно сотрудзовац зоз Союзом Руснацох Українцох, прето же тота орґанизация окончує вельку роботу и мисию за Руснацох и Українцох хтори жию на просторох Войводини и Сербиї, а хторей велї припаднїки тих меншинох часто анї нє свидоми. Амбасадор Олїйнїк подзековал Союзу на добре реализованих проєктох, инициятивох и идейох як и на добрим одношеню зоз амбасаду Союзу Руснацох Українцох Сербиї. Тиж так було слова и о успишним реализованю вецей акцийох як наприклад «Нєзагашуюца швичка», акция хтора преведзена у Европи и швеце як и у наших крайох на знак здогадованя на гладомор хтори ше одбул у України 1932-го -1933-го року. У своїх словох подзекованя Союзу амбасадор України похвалєл и руски и українски медиї хтори попровадзели шицки значни акциї хтори запровадзовала тота орґанизация у догварки зоз амбасаду України у Сербиї зоз Беоґраду. Тиж так вон спомнул и вецей успишни акциї хтори вплївовали на злєпшанє одношеньох медзи державами Сербию и Україну а як остатнє спомнул стретнуце предсиадтеля Україна Виктора Ющенка зоз Руску и Українску националну меншину у Скупштини городу Нового Саду под час отримованя Самиту лидерох Стреднєй и Юговосточней Европи.

Амбасадор Олїйнїк гварел же Українска амбасада будзе вше отворена за сотруднїцтво зоз Союзом Руснацох Українцох Сербиї кед у питаню реализованє добрих проєктох хтори Союз ма заплановани у своєй длугорочней роботи. Так то було и потераз, кед у питаню видавательна дїялносц а исную наздаваня же пошвидко до того придзе кед у питаню медиї. Вшелїяк же черанка материялох и филмох допринєше тому же би ше жителє Сербиї лєпше упознали зоз Україну и процивно, поведзене у одпитуюцим стретнуцу амбасдора України у Сербиї Анатолия Олїйнїка з нагоди нащиви Новому Саду.

М. М. Цап

XVII „ЛЕМКИВСКА ВАТРА” У ЖДИНЇ: ВИСТУП ДЮРДЬОВЧАНЬОХ БУДЗЕ ШЕ ПАМЕТАЦ

Под почесним патронатом предсидателя Републики Польскей Леха Качиньского и предсидателя Словацкей Републики Ивана Ґашпаровича, у Ждинї (Польска) од 17. до 19. юлия того року отримане XXVII Швето лемковскей култури „Лемкивска ватра”.

Тогорочна „Лемкивска ватра” у Ждинї була пошвецена 100-рочнїци од народзеня Богдана-Игора Антонича (1909-1937), поети з Новици, котри ошпивал Лемковщину на українским литературним язику. З нагоди того ювилею, його творчосц на сцени „Лемкивскей ватри” представели уметнїки Академского театру „Лес Курбас” з Львова и школяре IV Лицею з Лиґници.

Як и скорейших рокох, главни орґанизатор „Лемкивскей ватри” було Обєднанє Лемкох Польскей, а попри велького числа домашнїх фолклорних колективох, на фестивалє виступели и ансамбли з України, Канади, Словацкей и Сербиї.

Реґионалну лемковску културу представяли колективи писнї и танцу „Лемковина” з Львова, „Кичера” з Лиґници, „Ославяни” з Мокрого, „Лемкивска студенка” з Борислава и „Потичок” з Кошалина, док лемковски обряди представяли колективи „Яворина” з Дрогобича и „Кичера” з Якубянох у Словацкей. Медзи госцуюцима фолклорнимам ансамблами окреме ше визначели „Верховина” з Едмонтону (Канада) и „Карпатянин” з Пряшова (Словацка).

Зоз Сербиї на „Лемкивскей ватри” по перши раз виступело Културно-уметнїцке дружтво „Тарас Шевченко” з Дюрдьова, котре ше всоботу и внєдзелю представело зоз женску жридлову ґрупу, фолклорним ансамблом и оркестром. Дюрдьовски колектив приказал тото цо найлєпше на його репертоаре и по чим є вшадзи познати: жридлово писнї и танци Руснацох Войводини, а медзи нїма и танци з Горнїци и України. Публика шицко тото з вельким интересованьом провадзела и щиро их зоз кляпканьом наградзела.

Попри Дюрдьовчаньох, публики ше у Ждинї першого дня фестивала представела и рок-ґрупа „Крейзи казинс” з Руского Керестура, котру ше тиж будзе длуго паметац як нову „гвизду” того фестивала. З нїма бул и предсидатель „Пакта Рутенорум” Владимир Чижмар.

При врацаню з Польскей, члени КУД „Тарас Шевченко” з Дюрдьова дали барз успишни концерт у валалє Вишна Олшава (Словацка) и так на конкретни способ предлужели сотруднїцтво котре з тим местом започало пред вецей роками.

На фестивалє, попри найузшого руководства дюрдьовского Дружтва на чолє з його предсидательом Маринком Дудашом, присуствовали и Бранко Стаїч, предсидатель општини Жабель, Боґдан Виславски, предсидатель Союзу Руснацох Українцох Сербиї и Микола М. Цап, одвичательни редактор часописа „Шветлосц”.

Предсидатель општини Жабель Бранко Стаїч стретнул ше з вецей особами политичного и културного естаблишменту Польскей и Словацкей, медзи котрима бул и городоначалнїк Горлицох Кажимеж Стеркович, посланїк польского парламенту Витолд Кохан и началнїк Бардейовского округу Мартин Хома.

Госцованє наших колективох на „Лемкивскей ватри” у Ждинї орґанизовал Союз Руснацох Українцох Сербиї, а одход Дюрдьовчаньох материялно помогли општина Жабель и Национални совит рускей националней меншини.

ПРЕДСИДАТЕЛЬ УКРАЇНИ ШЕ СТРЕТНУЛ ЗОЗ ДИЯСПОРУ У СЕРБИЇ

Стретнуце предсидателя України Виктора Ющенка зоз представнїками українскей и рускей националней меншини

ОЗНАЧЕНА 70-РОЧНИЦЯ КАРПАТСКЕЙ УКРАЇНИ 13-ого ЮНИЯ У РУСКИМ КЕРЕСТУРЕ

Делегациї Шветовей Федерациї Українских, Русинских и Лемковских организацийох зоз Польскей, Словацкей пришли до Руского Керестура уж пияток вечар 12-го юния а госци зоз Горватскей, України и Зєдинених Америцких Державох припутовали до Руского Керестура соботу предполадньом.
Програма зашеданя Шветовей организациї почала зоз Службу Божу у Керестурским Катедралним храме святого отца Миколая хтору служел новосадски парох о. Роман Миз а сослужовали домашнї парох о. Михайло Малацко и капеланє Тони Ангелов и Дарко Рац. После Служби служена панахида владикови Дионизийови Нярадийови и положене квеце на його гроб.

Приход госцох до Храму св. Отца		Миколая У Руским Керестуре
Госци зоз Нового Саду на богослуженю		Служба Божа
Панахида
Делегация СФУЛО-а пред гробом		владики Нярадия
		Др. Янко Сабадош кладзе квеце на гроб владики Дионизия Нярадия

После законченя Служби Божей и Панахиди отримана Наукова Конференція о 70-рочнїци Преглашеня Карпатскей України и улоги владики Дионизия Нярадия як верховного духовного вожда у подїйох у Хусту,1939. року.

Предсидатель Союзу Руснацох Українцох Сербиї Богдан Виславски привитал делегациї зоз України, Польскей, Словацкей , Горватскей, ЗАД и домашнїх як и Олександра Кириченка, першого секретара Амбасади України у Сербиї.
Пан Кириченко бул и перши собешеднїк на Конференциї и окреме ошветлєл процес твореня Карпатскей України 1939. року.
О улоги у тим процесу преосвященого Дионизия Нярадия бешедовал магистер о. Михайло Малацко, хтори наглашел же владика бул познати борец як за церковне так и за народне єдинство и за националну свидомост, а знал ше особнє и зоз о. Августином Волошином першим предсидательом Карпатскей України.
На Конференциї о рижних аспектох тей теми бешедовал др Янко Сабадош зоз Београду.
Новинар Велимир Паплацко бешедовал о тим як Руски новини и Календар за 1940. рок приказали подїї коло формованя Карпатскей України и одношеню Руснацох зоз Войводини гу тим подїйом.
Олекса Павлишин бешедовал на Конференциї о Малим Лемковским Словнїку и писаню лемковских писанкох у Липовлянох, публикацийох хтори вон написал. Историчар Святослав Семенюк зоз Львова зоз України бешедовал о подїйох на Карпатскей України а академик Юлиян Тамаш у своєй бешеди толковал проблеми Соборносци и проблематику регионалного идентитету.
София Федина, политиколог и позната шпивачка лемковских писньох обрацела увагу присутних на шицко цо краши Українцох, Руснацох и Лемкох, як цо то музика, звичаї, язик и традиция, и же би вони то преношели на нови генерациї своїх нашлїдникох.
Конференцию закончел предсидатель Шветовей Федерациї Українских, Русинских , Лемковских Организацийох, доцент на Львовским Универзитету Володимир Ропецкий хтори наглашел медзи иншим же шицки ми шпиваме о червеней ружи алє найважнєйше же би вона була власносц шицких нас а то можльиве лєм зоз єдинством.
Пре кратки час други референти хтори пририхтали роботи як цо то Владо Костелник, Микола Цап, др. Янко Рамач и други нє були презентовани на Конференциї алє шицки буду обявени на сайту Союзу Руснацох Українцох Сербиї.

Початок Науковей Конференциї		Богдан Виславски привитує госцох и учаснїкох Конференциї у сали Каритасу
Наукова Конференция		Олександар Кириченко, перши секретар Амбасади України у Сербиї
о. мр. Михайло Малацко		др. Янко Сабадош
Велимир Паплацко		Олекса Павлишин
Святослав Семенюк		Академик Юлиян Тамаш
София Федина		Володимир Ропецки

Велимир Паплацко Нови Сад, 25 юний 2009.рок

ПЕРШИРАЗ ЗАШЕДАНЄ ПРЕДСИДАТЕЛЬСТВА СФУЛО У СЕРБИЇ У РУСКИМ КЕРЕСТУРЕ

Всоботу пополадню 13-го юния у будинку интернату керестурскей Основней школи и Гимназиї „Петро Кузмяк”, отримане VII зашеданє Предсидаельства Шветовей Федерациї українско,русинских лемковских организацийох (СФУЛО), котрому предсидовал доцент Львовского Универзитету, скулптор Володимир Ропецки, предсидатель СФУЛО, а у чиєй роботи учествовали Союз Русинох-Українцох Словацкей хтори представляли: Петро Сокол, др. Мирослав Сополига, Иван Лаба и Мирослав Илюк. Союз Русинох Українцох Горватскей представяли: мр. Теодор Фрицки, Славко Бурда, Мирко Федак, Олекса Павлишин и Гавриїл Такач. Товариство „Лемковщина” зоз Львова зоз України представяли: Володимир Ропецки, Игор Дуда, София Федина и Лидия Плахтий. Обєднанє Лемкох зоз Польскей представял Василь Шлянта, предсидатель т ого здруженя.Лемкох зоз ЗАД представял Володимир Максимович а Союз Руснацох Українцох Сербиї Богдан Виславски, Яким Грубеня и Велимир Паплацко. Цали час схадзку Предсидательства провадзел и участвовал у єй роботи перши секретар Амбасади України у Сербиї Олександар Кириченко.

Попри черанки искуствох и упознаваня зоз активносцами медзи двома зашеданями доминовала тема о роботи тей организациї у прешлим року як и плани роботи и сотруднїцтва за 2009. рок. На зашеданю презентована и мапа Лемковини, на хторей територия розсельованя Лемкох у гранїцох сучасней Польскей штредком XX вику як и розсельованє за границями Польскей ( до України) з оглядом же ше у остатнїм чаше и зоз наукового аспекту почина вше озбильнєше обрабяц єй историю( Лемковщини) за цо задлужени др. Мирослав Сополига, директор Українского Музею у Свиднїку у Словацкей. У наступним периодзе ше планує видац Историю Лемковини.

На сходзе визначене же треба активовац младеж о чим бешедовали Лидия Плахтий и политиколог и шпивачка лемковских писньох София Федина и през заєдницки екскурзиї до жемох членох Федерациї, упознац их зоз културу и обичаями людзох хтори у нїх жию. На концу VII зашеданя Предсидательства СФУЛО догварене же би ше направела окремна Резулуция хтору зробели др.Янко Сабадош и Володимир Ропецки а котра ше одноши на положенє Українцох, Руснацох и Лемкох у жемох котрих жию и була послана Предсидательови України Викторови Ющенкови. Ютре дзень Резулуцию на Рочней Скупштини Союзу у Вербаше презентовал др. Янко Сабадош.

На зашеданю СФУЛО подогваряне же на хторих фестивалох, у Снїни, Ждинї, Монастириску буду наступац културно – уметнїцки друштва зоз Сербиї, як и хто будзе госц на фестивалу Духовней писнї у Снїни як и на фестивалє Маковицка струна у Бардейове. Зоз Павлом Чучком младшим догварене сотруднїцтво як и участвованє на фотбалским турнире у Баранїнцох при Ужхородзе на котрим наступи єдна пионирска футбалска репрезентация зоз наших местох под меном „Русин”.

Тиж так було слово о тим хтори манифестациї як и стретнуца и науково конференциї нащиви делегация Союзу Руснацох Українцох Сербиї.

Госци истого дня вечар нащивели КПД Карпати у Вербаше дзе отримани рочни концерт друштва на хторим барз успишно виступела и госцинска зоз Львова София Федина.

В.Паплацко

Рочна скупштина Союзу Руснацох Українцох Сербиї

ПОВОЛАНКА

Поволуєм Вас на Рочну скупштину Союзу Руснацох Українцох Сербиї хтора будзе отримана 14. юния 2009. року на 11 годзин у сали КУД "Карпати", Нєґошева 21 у Вербаше.

ДНЬОВИ ШОР

1. Вибор роботного предсидательства
2. Вибор записнїчара
3. Вибор верификацийней комисиї
4. Уводне слово
5. Слово маю госци
6. Звит верификацийней комисиї
7. Звит о роботи Союзу у 2008. року
8. Финансийни звит за 2008. рок
9. План роботи у 2009. року
10. Финансийни план за 2009. рок
11. Дискусия, предкладаня и заключеня
12. Рижне

Предсидатель Боґдан Виславски, ср.