СОЮЗ РУСНАЦОХ УКРАЇНЦОХ СЕРБИЇ
У 2008. РОКУ
У фокусу дїялносци Союзу Руснацох Українцох Сербиї у 2008. року було
медзинародне сотруднїцтвo. Тот рок будзе запаметани и по тим же Семинар
за младих нє отримани пре нєдостаток финансийних средствох и по интернет
презентациї Союзу
Рочна скупштина
Рочна скупштина Союзу Руснацох Українцох Сербиї отримана у Новим Садзе,
14. юния 2008. року у просторийох КУД “Павел Йозеф Шафарик”. На нєй
звит роботи вибране нове руководство, а за предсидателя Союзу вибрани
Боґдан Виславски, подпредсидателя Велимир Паплацко, а секретаре Славко
Джуджар и Янко Киш. Нови члени Вивершней ради постали Дюра Варґа и Петро
Бесерминї, а до Главней ради вибрани Владо Папуґа и Михал Еделински.
За члена Контролней комисиї вибрана Таня Варґа.
По планох тот рок требал буц удатни як и шицки по тераз, медзитим пре
нєдостаток финансийних средствох у 2008. нє отримани Семинар за младих
хтори єден зоз найзначнєйших Союзових проєктох. Прето найвецей ощербени
учашнїки, а за наступни рок єден од приоритетох руководства Союзу будзе
остарац ше праве обезпечованє средствох за Семинар.
Члени Скупштини бешедовали о сотруднїцтве зоз медзинароднима институциями,
медзи другима и зоз Дружтвом “Україна-Швет” зоз Києва, з котрим подписана
догварка о студираню наших студентох на України.
З оглядом на пременку назви держави, прилапени и пременки штембилю и
печацу, як и пременка назви Союзу у Статуту, хтора тераз глаши Союз
Руснацох Українцох Сербиї.
О ситуациї на Закарпатю дискутоване по остатнєй точки дньового шору,
дзе Виславски наглашел же пришло до дзелєня у становискох Шветового
конґресу Руснацох/Русинох/Лемкох и Сойму подкарпатских Русинох, дзе
ше Шветови конґрес оградзел од толкованьох статусу Закарпатскей обласци
и положеню Русинох у України. Наглашене же нєт дискриминациї и репресиї
над тамтейшима Русинами, а Закарпатска обласц треба же би остала у составе
України.
Присутних и госцох привитал нови совитнїк у Амбасади України у Беоґрадзе
Олександер Кириченко, а госц на Скупштини бул и предсидатель “Обєднаня
Лемкох” зоз Польскей Штефан Гладик.
Медзинародне сотруднЇцтво
Науково-фахове совитованє з нагоди 40-рочнїци од снованя Союзу Русинох
и Українцох Републики Горватскей отримане 4. мая у Вуковаре, а на нїм
участвовали коло двацец учашнїки зоз Горватскей, Сербиї и Мадярскей.
З нашей жеми присуствовала делеґация Союзу Руснацох Українцох Сербиї
у составе Боґдан Виславски, Велимир Паплацко, Йоаким Грубеня, Микола
М. Цап и др Янко Сабадош.
Попри нїх, з нашей жеми зоз своїма рефератами участвовали и Штефан Гудак
и Мирон Жирош и з роботами о. Роман Миз, Дюра Латяк и др Янко Рамач.
Совитованє водзел предсидатель Союзу Русинох и Українцох Републики Горватскей
Славко Бурда, а було бешеди о значеню снованя Союзу, сотруднїцтве з
другима орґанизациями, видавательстве, манифестацийох, виучованю мацеринского
язика, очуваню народних традицийох, култури и просвити и других формох
роботи тей орґанизациї.
Госцованє вербаских “Карпатох” на Швету култури у Свиднїку 21. юния,
орґанизовал Союз Руснацох Українцох Сербиї, а на Фестивалу присуствовала
и делеґация општини Вербас у хторей були предсидатель Желько Лаинович,
заменїк предсидателя Мирослав Алексич и портпарол локалней самоуправи
Милан Ґлушац.
Делеґациї приял Михал Бартко, городоначальнїк Свиднїку и Милан Цоцуля,
руководитель Окружней канцелариї и посланїк Пряшовскей обласней самоуправи
и з тей нагоди догварене будуце културне и привредне сотруднїцтво медзи
Вербасом и Свиднїком.
Предсидатель Словацкей Републики Иван Ґашпарович ше у Свиднїку стретнул
зоз домашнїма и госцами, медзи котрима були и представнїки општини Вербас,
Совиту Месней заєднїци Петроварадин, КПД “Карпати” и делеґация Союзу
Руснацох Українцох Сербиї.
Свиднїчанє врацели нащиву, та предсидатель општини Вербас Желько Лаинович
и городоначальнїк Свиднїку, Милан Бартко, 20. октобра у Вербаше подписали
Меморандум о спорозуменю. Подписованю Меморандума о сотруднїцтве присуствовали
члени Вивершней ради Союзу Руснацох Українцох Сербиї Йоаким Грубеня
и Велимир Паплацко.
Меморандум облапя сотруднїцтво у обласци култури, спорта, привреди и
туризма, а постої можлївосц же би город Свиднїк помогнул општини Вербас
прейґ заєднїцких проєктох обезпечиц средства за розвой зоз фондох Европскей
униї.
У Ждинї у Польскей отримани 26. Фестивал “Лемковска ватра” на хторим
наступели и члени КУД “Петро Кузмяк” зоз Нового Орахова, а одход орґанизовал
Союз Руснацох Українцох Сербиї. Зоз презентованьом рускей свадзби зоз
Войводини и народних обичайох, Новоораховчанє репрезентовали културу
войводянских Руснацох.
У рамикох културно-туристичней манифестациї “Оберачка грозна” у Сримских
Карловцох 27. и 28. септембра, була делеґация зоз Бардейова зоз Словацкей
на чолє зоз городоначальнїком Бардейова др Борисом Ганущаком. Делеґацию
приял городоначалнїк Сримских Карловцох Миленко Филипович, а бешедоване
о дальшим сотруднїцтве, та и о братименю тих двох городох. Сотруднїцтво
и братименє городох иницирал Союз Руснацох Українцох Сербиї, а воно
функционує уж даскельо роки. Затераз найвецей успиху мало на спортским
и културно-уметнїцким планє.
Шветови конґрес УкраЇнцох
У Києве од 20.-22. авґуста отримани Шветови конґрес Українцох на хторим
присуствовали представителє велїх нєвладових орґанизацийох українскей
дияспори зоз цалого швета. Зоз Сербиї були присутни делегациї Дружтва
“Просвита” и Союзу Руснацох Українцох Сербиї.
Конґрес отворел предсидатель Асколд Лозински, а потим учашнїкох привитали
предсидатель України Виктор Ющенко и премиєр Юлия Тимошенко. Окрем нїх,
на Конґресу участвовали и министер нукашнїх дїлох України, министер
култури, министер вонкашнїх дїлох и найвисши представителє українских
церквох.
Члени тей орґанизациї поднєсли звити о своєй роботи, як и положеню дияспори
у їх жемох. Предсидатель Союзу Руснацох Українцох Сербиї Боґдан Виславски
реферовал присутним о дїялносци Союзу и положеню Руснацох и Українцох
у Сербиї, дзе наглашел же нашо права надвисшую права котри предвидзени
зоз медзинароднима нормами котри реґулую права националних меншинох.
Остатнього дня Конґресу вибрани нови орґани того цела, бо старим вишол
мандат, та за предсидателя Конґресу вибрани Евґен Чолїй, адвокат зоз
Америки.
Делеґацию Союзу приял брат предсидателя України, Петро Ющенко, заменїк
министра култури України Олґа Бенч и амбасадор Сербиї у Києве Ґоран
Алексич.
Означовaни Голодомор
До Сербиї 8. септембра з Италиї сцигла “Нєзагашуюца швичка” зоз чим
у нашей держави почало означованє українского Гладомору 1932/33. року.
У Грекокатолїцкей парохиї св. Кирила и Методия у Беоґрадзе о. Владислав
Варґа служел парастос жертвом Гладомору, а присутни були амбасадор України
у Беоґрадзе Анатолий Олїйник, народни и покраїнски посланїки у Скупштини
Сербиї Олена Папуґа, Дюра Мученски, Леона Виславски, предсидателє руского
и українского националного совиту Славко Орос и Мирослав Калинюк, як
и предсидатель Союзу Руснацох Українцох Сербиї Боґдан Виславски и вельке
число госцох и парохиянох.
У Каритасу у Беоґрадзе з тей нагоди отворена вистава плакатох на тему
Гладомору, а проф. др Владислав Верстюк зоз Києва отримал преподаванє
на тему “Гладомор – велька українска траґедия”. После преподаваня приказани
документарни филм українскей продукциї “Технолоґия ґеноциду”.
У церкви св. ап. Петра и Павла у Новим Садзе 10. септембра у присустве
апостолского еґзарха за грекокатолїкох СЧГ кир Георгия Джуджара и представнїкох
Українскей националней ради, парох о. Роман Миз служел панахиду, а шпивал
Хор церкви у Новим Садзе и РКПД. Союз Руснацох Українцох Сербиї участвовал
и у тей подїї.
Панахиди и подобни програми отримани и у Индїї, Сримскей Митровици,
Вербаше и Кули, а “Швичка” потим придата рускей и українскей дияспори
у Горватскей.
Акция “Нєзагашуюца швичка” рушела того року з Австралиї, та обидзе 33
жеми швета, а будзе закончена у новембре у України.
Промоция филма
У Руским културно-просвитним дружтве у Новим Садзе у орґанизациї Союзу
Руснацох Українцох отримана премиєрна проєкция филма “Траґедия Карпатскей
України” знїмателя Василия Авраменка хтори зазначел траґични подїї зоз
свою камеру, а познєйше сцекол до ЗАД.
Тот филм пред 15 роками бул приказани на науковей конференциї “Українски
Карпати” у Ужгородзе.
У Союзу Руснацох Українцох догварене же би филм бул приказани и у других
наших местох, з оглядом же є вязани за нашу историю, окреме прето же
вибеженци зоз Карпатскей України на чолє зоз Авґустином Волошином нашли
нови дом у наших людзох у Шидзе, Руским Керестуре, Коцуре.
ПромоциЇ кнЇжкох
Промоция кнїжки “Українски сказки” отримана у Дружтве писательох Войводини
у Новим Садзе 19. марца. Видаватель кнїжки “Українски сказки” Союз Руснацох
Українцох Сербиї, а Министерство вонкашнїх дїлох України прейґ Амбасади
України у Беоґрадзе финансийно потримало проєкт.
Медиятор вечара бул Владимир Кочиш, а о кнїжки бешедовали асистентки
зоз Катедри за українистику у Беоґрадзе Таня Ґаев и Милена Иванович,
хтори преложели сказки. Кнїжку илустровал академски маляр Михайло Писанюк,
а вона уж дожила промоцию у Баня Луки.
Проф. др Янко Рамач, член Союзу свою кнїжку “Руснаци у Южней Угорскей
1745–1918” промововал у Новим Садзе 27. мая. О кнїжки бешедовал сам
автор, як и мр Дюра Гарди, Мирон Жирош и Штефан Гудак.
Кнїжку видала Войводянска академия наукох и уметносцох, и вона перша
кнїжка обявена у едициї докторских дисертацийох у тей младей войводянскей
институциї.
На промоция кнїжки присуствовал и перши секретар Амбасади України у
Беоґрадзе Анатолий Старостенко, а вечар орґанизовали РКПД и Городска
секция Союзу Руснацох Українцох Сербиї.
Успихи и припознаня членох Союзу
Наукова наставнїцка рада Протестантского теолоґийного факултету у Новим
Садзе на схадзки 25. марца, єдногласно принєсла Одлуку о додзельованю
почесного доктората маґистрови о. Романови Мизови хтори член Союзу.
Др Димитриє Попадич визначел же о. Роман Миз перши добитнїк того почесного
доктората, прето же вон нє лєм прекладатель, автор текстох и кнїжкох,
алє и тройнїсти маґистер. Титула почесного докторату додзелєна з нагоди
Мизовей екуменскей дїялносци и виданих кнїжкох з тей обласци.
Дзень нєзависносци УкраЇни
Амбасадор України, його екселенция Анатолий Олийник 15. септембра у
готелу “Гаят” у Беоґрадзе отримал банкет з нагоди Дня нєзависносци України.
Окрем представительох Амбасади у Беоґрадзе, як домашнїх, на банкету
були и представителє дипломатичного кору, привреднїки, воєни аташеи
у Сербиї, та и принцеза Катарина и принц Александер Карадьордєвич.
На приєму були и представителє Националного совиту Українцох, апостолски
еґзарх кир Георгий Джуджар, священїки грекокатолїцкей церкви и парохийох
у Новим Садзе, Беоґрадзе и Индїї, як и делеґация Союзу Руснацох Українцох
Сербиї, посланїци републичного и покраїнского парламента Олена Папуґа
и Леона Виславски, та и велї нашо еминентни фаховци.
Интернет презентация Союзу
Же ше Союз Руснацох Українцох Сербиї намага буц сучасни, потвердзує
и остатнї тогорочни проєкт – интернет презентация. На веб адреси www.rusuk.org
хтору креїровала Ясна Варґа, мож найсц шицки релевантни информациї о
дїялносци, проєктох, членох и актох. Сайт ше будзе дорабяц у наиходзацим
периодзе и будзе поряднє ажуровани.
Александра Дудаш
План активносцох за 2008. рок
У 2008. року Союз Руснацох Українцох будзе окончовац шлїдуци активносци:
- орґанизовац сотруднїцтво з орґанами Републики Сербиї у вязи зоз злєпшаньом
положеня Руснацох Українцох,
- орґанизовац одходи студентох на школованє до України,
- участвовац у сотруднїцтве з СКУ, ЕКУ, СФУЛО и подобнима орґанизациями,
- помагац у сотруднїцтве Републики Сербиї з Україну насампредз у обласци
економского, културного и наукового сотруднїцтва и подобне,
- помагац сотруднїтво Републики Сербиї зоз другима жемами дзе традицийно
жию Руснаци Українци (Польска, Словацка и т.д) ,
- орґанизовац сотруднїцтво з нашима традицийнима партнерами у иножемстве,
насампредз зоз Союзом Русинох-Українцох Словацкей, Обєднаньом лемкив
з Польскей, Союзом Русинох Українцох Горватскей, Українску матицу у
БиГ-у, Товариством Українскої култури у Мадярскей, Дружтвом Русинох
Українцох у Словениї «Карпати» и подобне,
- орґанизовац означованє подїйох и подобох котри значни за нашу народносц,
- орґанизовац одходи наших ансамблох у делеґацийох на фестивали у Свиднїку
(Словацка), «Лемкивска ватра» у Польскей, Фестивал духовней писнї у
Снини (Словацка), «Маковицка струна» (Словацка), «Петровски дзвон» у
Горватскей у друге,
- орґанизовац нащиви делеґацийох и ансамблох у матичней держави,
- участвує на наукових и фахових совитованьох,
- орґанизовац лєтну школу за дзеци з обласци русинистики и українистики,
- будзе сотрудзовац з Товариством «Україна-свит»,
- будзе орґанизовац сотруднїцтво з амбасаду України у Беоґрадзе,
- будзе помагац сербским и другим здруженьом, орґанизацийом и институцийом
у вязи сотруднїцтва з Україну,
- будзе провадзиц применьованє законских и других предписаньох у вязи
положеня националних меншинох у Сербиї,
- будзе орґанизовац сотруднїцтво з другима меншинскима орґанизациями
у Сербиї и иножемстве,
- будзе координовац роботу секцийох по наших местох,
- будзе видавац «Глас Союзу» и други виданя согласно одобреним средством
по проєктох
Финансийни план за 2008. рок
За окончованє дїялносци Союзу у 2008. року нєобходно обезпечиц шлїдуюци средства:
- за видаванє „Гласа Союзу“ 100.000,00 дин
- за дїялносц секцийох 60.000,00 дин
- за трошки одходу наших делеґацийох и приманє госцох з иножемства 100.000,00
дин
- за трошки друкованя кнїжкох 200.000,00 дин
- за трошки Лєтней школи 400.000,00 дин
- за административни трошки 50.000,00 дин
- за одход наших ансамблох до иножемства 350.000,00 дин
- за стажированє за ґлумцох, режисерох и хореоґрафох у України 60.000,00
Вкупно: 1.800.000,00 дин
Средства ше планує витвориц з боку општинох, АП Войводини, Републики Сербиї, Националного совиту Русинох и приватних донаторох
З дїялносци Союзу – Із діяльності Союзу
Боґдан Виславски
Стретнуце зоз представителями Совиту Европи
Дня 7. фебруара 2008. року представителє Совиту Европи прияли представительох
меншинских орґанизацийох АП Войводини. Стретнуце ше одбуло у просторийох
Вивершней ради АП Войводини зоз представителями каждей орґанизациї окреме.
Представительох Совиту Европи окреме интересовало питанє пестованя меншинских
язикох.
У мено Союзу Русинох-Українцох Сербиї на стретнуцу бул дипл. правнїк
Боґдан Виславски. Вон упознал членох Совиту Европи зоз мрежу основних
школох у котрих ше стаємно, або факултативно, виучую руски и українски
язик, о иснованю ґимназиї у Руским Керестуре, Катедри за руски язик
и литературу при Филозофским факултету у Новим Садзе. Вон ше окреме
огляднул на проблеми при приватизациї електронских медийох, при применьованю
меншинских язикох у управи и судских поступкох итд.
У истей нагоди були прияти и представителє Националного совиту Руснацох,
Українскей националней ради и Дружтва за руски язик, литературу и културу.
Отримани IX Шветови конґрес Українцох
Шицки зме Русини, наглашел предсидатель Українскей шветовей координацийней
ради Дмитро Павличко
У Києву од 20. до 22. авґуста того року отримани Шветови конгрес Українцох. На истим присуствовали представителє велїх нєвладових орґанизацийох українскей дияспори зоз цалого швета, медзи иншим з ЗАД, Канади, Русиї, Австралиї, Францускей, Белґиї, Парагваю, Словацкей, Горватскей, Мадярскей, Портуґалиї, Сербиї итд.З Сербиї були присутни делеґация дружтва «Просвита» и Союзу Русинох Українцох Сербиї.
Конґрес отворел предсидатель Асколд Лозински, а потим учашнїкох привитали предсидатель України Виктор Юшченко и премиєр Юлия Тимошенко. Окрем нїх, на Конґресу вжали учасц и министер нукашнїх дїлох України, министер култури, министер вонкашнїх дїлох, найвисши представителє українских церквох итд. Предсидатель Українскей шветовей координацийней ради Дмитро Павличко у своїм наступу наглашел же зме шицки Русини, а цо вжате до огляду при прилапйованю Резолуциї Конґресу.
На Конґресу, члени истохо поднєсли звити о своєй роботи и ситуацийох у їх жемох, як и положеню дияспори у истих. З нашого боку, предсидатель Союзу Русинох Українцох Сербиї Боґдан Виславски реферовал присутним о дїяалносци Союзу и положеню Русинох и Українцох у Сербиї, дзе наглашел же нашо права надвишую права котри предвидзени зоз медзинароднима нормами котри реґулую права националних меншинох.
Остатнього дня Конґресу вибрани нови орґани Конгресу, бо старим вишол мандат, та за предсидателя вибрани Евґен Чолїй, адвокат з Америки.
Дня 21 авґуста, на Михайловскей площи у Києву, у присуству найвиших представнїкох українских церквох, отримана панахода пошвецена жертвом голодомору на України, котри ше одбул 1932. и 1933. року, од чого помарло медзи седем до дзешец милиони людзох
.
Делегацию Союзу приял брат предсидателя України, Петро Юшченко, заменїк министра култури України Олга Бенч и амбасадор Сербиї у Києву Ґоран Алексич.
В. Паплацко
„Лемковска ватра“ у Ждинї
Прешлого викенду у месту Ждиня у южней Польскей отримани 26-ти фестивал „Лемковска ватра“ на хторим виступели и члени Културно-уметнїцкого дружтва „Петро Кузмяк“ зоз Нового Орахова. Зоз презентованьом рускей свадзби зоз Войводини, народним обичайом хтори прицагнул вельку увагу шицких на фестивалу, Новоораховчанє достойно репрезентовали културу войводянских Руснацох. Попри домашнїх ансамблох, найвецей лемковских зоз рижних местох Польскей на своїх матичних жемох у Шльонску, лєбо Шлезиї, дзе су вигнати до цудзини после Другей шветовей войни у акциї „Висла“. Тиж так, на фестивалу було и вецей ансамбли, шпиваче и шпивачки зоз України, Словацкей и Чешскей, ЗАД, Канади и Австралиї.
Тогорочни фестивал тирвал три днї, пияток, всоботу и нєдзелю, а под час його тирваня горела традицийна лемковска ватра у центре простору, нєдалєко од бини, дзе ше отримовал фестивал. Тогорочни староста ватри бул Петро Чухта, познати активиста Лемковскей орґанизациї зоз Ґорлицох, за реализацию и режию програми ше старала Виктория Гойсак, а конферансу водзели Мария Буковска, Иван Вавак, Ярослав Гладик, Юстина Нецо, Михал Баюс и Владимир Гойсак, а у шицким им помагал и Емил Гойсак.
Кед слово о ансамблох хтори участвовали на тогорочним фестивалу, треба спомнуц ансамбл Лемковина з Львова, колектив танєчного ансамблу ґимназиї на лемковско українским и руским язику “Аркан” зоз городу Пшемислу у Польскей. Тиж так, бул присутни и колектив козакох з України, ансамбл Кучера зоз Лиґници, а зоз Старей Любовнї виступел колектив “Барвинок”, а єдна зоз найпознатших шпивачкох України, позната як Анїчка – Гана Чеберенчик з Львова прикрашела и того року тоту манифестацию.
Треба повесц же публика була барз заинтересована за програму новоораховчанох и после виводзеня “Рускей свадзби зоз Войводини” наградзела наших аматерох зоз барз вельким аплаузом. На фестивалу вони виступели трираз, двараз всоботу и раз внєдзелю и такой достали поволанку же би нарок зоз тоту точку виступели и на познатим фестивалу “Свиднїк” у Словацкей, дзе их поволал Янко Чижмар зоз Свиднїку, котри пише сценарио за наиходзаци свиднїцки фестивал котри концепцийно будзе пошвецени свадзебним обичайом наших людзок котри жию у рижних жемох Европи.
На концу поведзме же на найвекшим фестивалу рускей, українскей лемковскей култури було присутне вецей як 20 000 патрачох. Тото красне искуство Новоораховченє дожили дзекуюци Союзу Руснацох Українцох Сербиї, а наїнтересантнєйши хвильки зазначени зоз камеру Кароля Ковача, познатого автора телевизийних емисийох з Нового Саду. З нїма на путованю були предсидатель Союзу Боґдан Виславски, подпредсидатель Велимир Паплацко, як и член Главней ради Союзу Йоаким Грубеня.
27. юния 2008. року
„Лемковска ватра“ у Монастирским
Початком авґуста, точнєйше, 2. и 3. авґуста у месце Монастирско у України
будзе отримани всеукраїнско – русински фестивал “Лемковска ватра”, хтори
орґанизує здруженє Лемкох з України. На тим фестивалу буду указани досяги
лемковскей култури у жемох у хторих Лемки нєшка жию. Поведзме же то
єдна з манифестацийох прето же ше лемковски ватри отримую у Леґници,
Ждинї, Монасторску и у Канади. На спомнутим фестивалу у двох дньох виступя
числени ансамбли, як лемковски, так и други, зоз України, Польскей,
Словацкей, Ческей, Канади, Америки и Австралиї. Предсидатель тамтейшого
здруженя Лемкох, пан Вен Гринович нам гварел же би дзечнє видзел на
том фестивалу и єден ансамбл зоз Войводини – Сербиї. Пре кратки час
и лєтну павзу, вироятнє же нїхто з наших ансамблох того року на фестивал
нє пойдзе, алє ше наздаваме же там буду представителє Союзу, хтори достал
урядову поволанку же би дахто з його членох бул госц.
27. юлий 2008. року
36. фестивал „Маковицка струна”
На Миколая по новим календаре 6. и 7. децембра 2008. року у Бардейове
и Пряшове отримани фестивал „Маковицка Струна”. Бул то 36. фестивал
народних шпиванкох на хторим наступели вецей як сто виводзаче. Госци
зоз Орахова припутовали до Бардейова пияток пополадню и по змесцованю
до Словацко-Польского Дому на Старей площи присуствовали вечаршим шветочносцом
з нагоди Миколая дзе вон наймладших даровал зоз пакециками.
Панорама Бардейова – Стара площа зоз Городску хижу
и катедралу св. Едигия
Словацко-Польский Дом на Старей площи
украшени за швета
Шветочносц на площи з нагоди Миколая
Того року по перши раз на Маковицкей струни були и госци зоз Войводини
зоз Сербиї. Були то члени Културно –уметницкого друштва „Петро Кузмяк”
зоз Нового Орахова зоз шпивачами Борисом Магочом и Саню Полдруги, хтори
наишли на барз добри приєм при публики як у Бардейове, так и у Пряшове.
У Бардейовскей спортскей гали „Мир” всоботу отримани два концерти, єден
за членох жирия у попладньових ходзинох а вечар гала концерт. Внедзелю
пополядню гала концкрт повторени у Пряшове у Словацким театре „Йонаш
Заборски” дзе була полна сала нащчивительох хтори учасником и госцом
щиро аплаудировали, а окреме кед слово о госцох зоз Войводини.
Концерт у Бардейове
Учаснїки концерта у Пряшове зоз водителями
Наступ Санї Полдруги и Бориса Магоча зоз провадзеньом орхестри Културно–уметницкого друштва „Петро Кузмяк” зоз Нового Орахова
Вельки аплаузи окреме на концерту у Пряшове достал и дует бандуристох
зоз Львова зоз України. Фестивал отворел Иван Лаба предсидатель Союзу
Русинох-Українцох Републики Словацкей. Попри Союзу як организатор фестивала
бул и город Бардейов у хторим пияток 5 децембра пребувал и городоначальник
Сримских Карловцох Миленко Филипович хтори зоз ородоначальником Бардейова
Борисом Ганущаком подписал контракт о сотруднїцтве двох городох.
Хоч по тераз отримани 36 фестивали, по перши раз ше на єдним зоз нїх
зявели шпиваче зоз Нового Орахова дзекуюци Союзу Руснацох Українцох
Сербиї хтори им оможлївел тото госцованє.
